Համաշխարհային բժշկության ոլորտում իրենց ձայնը հնչեցրած հայերը

ԵՐԵՎԱՆ, 19 օգոստոսի – Sputnik. Հայերը պատմության տարբեր ժամանակահատվածներում կարևոր դեր են խաղացել իրենց հայրենիքի սահմաններից դուրս, անփոխարինելի ավանդ են ներդրել այս կամ այն պետության մշակույթի, գիտության, փիլիսոփայության և բժշկության բնագավառում։

barev.today–ը զետեղել է հայազգի որոշ ներկայացուցիչների անուններ, ում ավանդը համաշխարհային բժշկության ոլորտում զգալի է և արժանի է հարգանքի։

Միհրան Ղասաբյանը (1870-1910 թթ., Ֆիլադելֆիա, ԱՄՆ) բժշկությունում ռենտգենյան ճառագայթների կիրառման բնագավառում գյուտարարներից մեկն է։ Նրա հիմնադրած ամերիկյան ռենտգենյան լաբորատորիայում Ղասաբյանը մշակել է ռենտգենյան ճառագայթների օգնությամբ չարորակ ուռուցքների բուժման մեթոդ։ Այդ թեմայով նա նաև գիրք է գրել, իսկ մի քանի տարի անց դարձել է էլեկտրական թերապիայի ամերիկյան միության նախագահ։

Վիգեն Գեոդակյան (1925-2012 թթ., Ռուսաստան) – ականավոր կենսաբան, կենսաքիմիկոս, սեռի, սեռական երկձևության, հոնոսոմերի և «նոմադիկ» գեների էվոլյուցիոն տեսությունների, օրգանիզմների անհամաչափության, ուղեղի ֆունկցիոնալ անհամաչափության, կրկնակի օրգանների տեսությունների հեղինակ, ՌԳԱ Ա.Ն.Սևերցովի անվան բնապահպանության և էվոլյուցիայի խնդիրների ինստիտուտի կենսաակուստիկայի լաբորատորիայի գիտաշխատող։

Ջոն Նաջարյան (1927 թ., Մինեսոտա, ԱՄՆ) բժշկության հիմնարար «Փոխպատվաստում» բնագավառի հիմնադիրն է։

Հրանտ Դեմիրճօղլյան (1927 թ., Մոկսվա, Ռուսաստան) – ակնաբույժ, կենսաֆիզիկոս, աշխարհում առաջին ոչ ոսպնյակային և առողջացնող ակնոցի հեղինակ, Մոսկվայի ռադիոէլեկտրոնիկայի և ավտոմատիկայի ինստիտուտի պրոֆեսոր։

Ջեք Կևորկյան (1928 — 2011 թթ., Դեթրոյթ, ԱՄՆ) – ամերիկահայ բժիշկ, էֆթանազիայի համար դեղամիջոցների չափաբաժինների հեղինակ` 1989 թվականին մշակել է անալգետիկների և թունավոր նյութերի մահացու չափաբաժիններ անհույս հիվանդների արյան մեջ ներարկելու համար։ Այդ դեղամիջոցներով նա օգնել է ավելի քան 130 ծանր հիվանդների առանց տանջանքների մահանալու համար։

Արամ Չոբանյան (1929 թ., Բոստոն, ԱՄՆ) – աշխարհում հիպերտոնիայի և աթերոսկլերոզի առաջատար մասնագետներից մեկը։ ԱՄՆ բժիշկների միության նախագահ, արյունատար անոթների և սիրտ–անոթային ինսուլտւ ուսումնասիրության լաբորատորիայի տնօրեն։ Նոբելյան մրցանակի դափնեկիր բժշկության բնագավառում և Հայաստանի Հանրապետության ԳԱԱ պատվավոր անդամ։ Այսօր Չոբանյանը Հարվարդի համալսարանի պրոֆեսոր է, ինչպես նաև Հարվարդի բժշկության դպրոցի նախագահ։

Սամսոն Վիրաբով (1946 г., Ստավրոպոլ, Ռուսաստան) – օրթոպեդ վնասվածքաբան, աշխարհում անալոգ չունեցող արհեստական հոդերի հեղինակ։

Վարազդատ Ղազանջյան (1879 —1974 թթ., Մասաչուսետս, ԱՄՆ) – ամերիկյան պլաստիկ վիրաբուժության հիմնադիր։ 1922-1935 թվականներին աշխատել է «դիմածնոտային վիրաբուժության» բնագավառում և դարձել է առաջին գիտնականը, ով ստացել է ԱՄՆ պլաստիկ վիրաբուժության պրոֆեսորի գիտական աստիճան։