«Ժառանգությունը» հրաժարվել է Հայաստանի նախագահի հետ քննարկել նոր սահմանադրությունը

ԵՐԵՎԱՆ, 27 օգոստոսի– Sputnik. «Ժառանգություն» կուսակցության ներկայացուցիչները հրաժարվել են մասնակցել Հայաստանի նախագահի հետ սահմանադրական բարեփոխումների շուրջ քաղաքական խորհրդակցությունների, քանի որ նրա ներկայացրած առաջարկները մերժվել են, հինգշաբթի «Sputnik-Արմենիա» գործակալությանը հայտնեց կուսակցության անդամ Արմեն Մարտիրոսյանը։

Նախագահը նախօրեին սկսել է հանդիպումներ անցկացնել երկրի քաղաքական ուժերի հետ` սահմանադրական բարեփոխումների նախագծի վերաբերյալ։ Այդ գործընթացի շրջանակում արդեն տեղի են ունեցել հանդիպումներ «Բարգավաճ Հայաստան», ՀՅԴ և «Օրինաց երկիր» կուսակցությունների ներկայացուցիչների հետ։ Ընդ որում, «Ժառանգություն» կուսակցությունից բացի այդ հարցի շուրջ նախագահի հետ հանդիպումից հրաժարվելու մասին հայտարարել է նաև «Հայ ազգային կոնգրեսը»։

«Մենք հրաժարվել ենք քննարկումներից, քանի որ մեր առաջարկներից ոչ մեկը չի ընդունվել։ Մենք կարծում ենք, որ նոր նախագիծն ուղղակի անընդունելի է։ Մենք համաձայն չենք շատ կետերի հետ, մասնավորապես, տարածքային ամբողջականության, խորհրդարանական ընտրությունների երկրորդ փուլի անցկացման, մարդու իրավունքների, ինքնակառավարման հարցերում»,– նշեց նա։

Մարտիրոսյանի խոսքով` «Ժառանգությունը» դեմ չէ սահմանադրական բարեփոխումներին, սակայն նոր նախագիծը չի համապատասխանում նրանց պատկերացումներին, քանի որ դրանում չափազանց շատ վիճելի կետեր կան, և նման սահմանադրություն ընդունելն ուղղակի անթույլատրելի է։

ՀՀ նախագահին առընթեր Սահմանադրական բարեփոխումների մասնագիտական հանձնաժողովը օգոստոսի 21–ին հաստատել է սահմանադրական բարեփոխումների ամբողջական փաթեթը, որով նախատեսվում է անցում կատարել խորհրդարանական կառավարման կարգին` դրան հարակից բոլոր հիմնավորումներով։ Նույն օրը ՀՀ նախագահ Սերժ Սարգսյանը նախագիծը ներկայացրել է խորհրդարան։
Մայր օրենքի նախագծի գլուխների հրապարակված դրույթները վերաբերում են սահմանադրական կարգի հիմունքներին, մարդու և քաղաքացու հիմնական իրավունքներին և ազատություններին, սոցիալական, օրենսդրական երաշխիքներին ու տնտեսական և մշակութային ոլորտներում պետական քաղաքականության հիմնական նպատակներին, խորհրդարանի, նախագահի, կառավարության, դատարանների և նոր մարմնի` Գերագույն դատական խորհրդի, դատախազության և քննչական մարմինների, տեղական ինքնակառավարման մարմինների, Օմբուդսմենի, ԿԸՀ–ի գործունեությանը։