ԵՐԵՎԱՆ, 24 հունվարի- Sputnik. Հայաստանի հավաքականի ֆուտբոլիստ Արաս Օզբիլիսի տեղափոխվելը ոչ մի կերպ չի ազդի հավաքականում ունեցած դիրքի վրա, Sputnik Արմենիա պորտալին ասաց Հայաստանի հավաքականի հավատարիմ երկրպագու, ԱԺ պատգամավոր Լևոն Մարտիրոսյանը:
Հունվարի 23-ին «Սպարտակի» կայքում պաշտոնական հաղորդագրություն է հրապարկվել այն մասին, որ հայ կիսապաշտպան Արաս Օզբիլիսը մոսկովյան ակումբից տեղափոխվել է թուրքական «Բեշիկթաշ»: Ավելի ուշ Instagram-ի իր էջում Օզբիլիսը գրել է, որ «Բեշիկթաշի» հետ պայմանագիրն արդեն ստորագրել է:
«Ես դրան նորմալ եմ վերաբերվում: Նա ֆուտբոլիստ է և գնացել է այն ակումբ, որը նրան ձեռք է բերել, իսկ Բեշիկթաշը հայտնի եվրոպական ակումբ է, այլ ոչ թե երկրորդական թիմ: Եթե նա այդ որոշումը ճիշտ է համարում, ուրեմն դա լավագույն տարբերակն է»,- ասաց Մարտիրոսյանը:
Պատգամավորը ոչ մի խնդիր չի տեսնում թուրքական ակումբ տեղափոխվելու մեջ և հիշեցնում է, որ Օզբիլիսը ծնվել է Ստամբուլում, և նրա ընտրությունը մասամբ պայմանավորված է այդ հանգամանքով: Մարտիրոսյանի կարծիքով՝ ֆուտբոլիստը «Սպարտակում» վատ էր խաղում:
«Չգիտեմ, թե ինչու էր նա այնտեղ վատ խաղում, բայց լավ է, որ լքել է թիմը և տեղափոխվել այնտեղ, որտեղ խաղային փորձ կունենա: Առավել ևս, որ նա կես տարի խաղալու է իսպանական թիմում («Ռայո Վալյեկանո»)»,- նշեց պատգամավորը:
Օզբիլիսի տեղափոխության հարցը տարբեր քննարկումների առիթ դարձավ թեկուզ հենց այն պատճառով, որ անցած տարվա գարնանը ֆուտբոլիստը որոշ խնդիրներ էր ունեցել «Սպարտակի»՝ ազգությամբ թուրք շվեյցարացի մարզչի հետ: Հարցազրույցներից մեկում Օզբիլիսն ասել է, որ Յակինը նրան խաղադաշտ չի թողել, թեև վնասվածքից հետո նա լրիվ ապաքինվել էր: Կիսապաշտպանը ենթադրել է, որ դա կապված է հայ-թուրքական հարաբերությունների հետ:
Ռուսական Պրեմիեր լիգայի անցած խաղաշրջանի արդյունքով Մոսկվայի «Սպարտակը» եվրոպական գավաթների մասնակցելու ուղեգրեր չի նվաճել: Ընթացիկ խաղաշրջանում Օզբիլիսը «Սպարտակի» կազմում անցկացրել է ընդամենը 9 խաղ և դարձել մեկ գոլի հեղինակ: 2013թ.-ից «Սպարտակում» հանդես գալու ողջ ընթացքում Օզբիլիսն անցկացրել է 40 խաղ և ընդամենը հինգ գոլի հեղինակ դարձել: Կիսապաշտպանն ակումբ էր տեղափոխվել «Կուբանից»:
