ԵՐԵՎԱՆ, 8 փետրվարի — Sputnik. Հայտնի կինոռեժիսոր, սցենարիստ ու պրոդյուսեր, Երևանի «Ոսկե ծիրան» միջազգային կինոփառատոնի տնօրեն Հարություն Խաչատրյանը դարձել է Հայաստանի ազգային կինոակադեմիայի ղեկավար։
Այս պաշտոնում նա փոխարինել է Դավիթ Մուրադյանին, ով Ակադեմիան գլխավորել է 4 տարի։
Նոր ղեկավարի գլխավորությամբ Հայաստանի ազգային կինոակադեմիայի առաջին նիստը կանցկացվի այս տարվա մարտին։ Նիստի ընթացքում կներկայացվի կազմակերպության փոխված կանոնակարգը, ինչպես նաև կներկայացվի կազմակերպության գործունեության մոտակա երկու տարվա ծրագիրը։
Ակադեմիայի գլխավոր քարտուղարն է կինոքննադատ Րաֆֆի Մովսիսյանը։
«Հայաստանի ազգային կինոակադեմիա» ՀԿ-ն ստեղծվել է 2011 թվականին։ Ակադեմիան զբաղվում է գիտական ու հրատարակչական գործունեությամբ։
Ժամանակին ակադեմիան համագործակցում էր «Ոսկե ծիրան» միջազգային կինոփառատոնի, Հայաստանի կինեմատոգրաֆիստների միության և այլ կազմակերպությունների հետ։
1981-86 թվականներին Հարություն Խաչատրյանն աշխատել է վավերագրական ֆիլմերի ստուդիայում, 1987-2005 թվականներին` «Հայֆիլմ» կինոստուդիայում։
1987 թվականին Մոսկվայում Երիտասարդ կինեմատոգրաֆիստների փառատոնում նա առաջին մրցանակի արժանացավ «Կոնդ» (1987) վավերագրական ֆիլմի համար, իսկ արդեն մեկ տարի անց Թբիլիսիում արժանացավ «Տարվա լավագույն ֆիլմ» մրցանակի։
Խաչատրյանը հաղթել է մի շարք միջազգային մրցույթներում և ստացել հեղինակավոր մրցանակներ։
