ԵՐԵՎԱՆ, 10 փետրվարի — Sputnik. XVI դարի բացառիկ Աստվածաշունչը կարելի է տեսնել հայկական տաղավարում, հայտնում է Sputnik Բելառուսը։
Գրքի ցուցահանդեսը գործելու է «Բելէկսպո» կենտրոնում մինչև փետրվարի 14-ը։ Հայաստանը ֆորումի պատվավոր հյուրն է։
«Մեր տաղավարի գլխավոր պարծանքը բացառիկ Աստվածաշունչն է, որը հրատարակվել է XVI դարում, չորս տարի առաջ մենք նշեցինք այս գրքի 500-ամյակը», — Sputnik-ին է պատմել Հայաստանի մշակույթի փոխնախարար Արթուր Պողոսյանը։
Նա նշել է, որ հայկական տաղավարում ներկայացված է լինելու գիտական ու գեղարվեստական շուրջ 200 անուն գիրք։
«Մենք բերել ենք նաև Հայոց ցեղասպանությանը նվիրված գրքեր, որոնք տպագրվել են տարբեր լեզուներով, ինչպես նաև` հայերեն տպագրված առաջին Աստվածաշունչը», — պատմել է Պողոսյանը։
Գիրքն, իհարկե, ֆաքսիմիլային է, սակայն ընդամենը երեք այսպիսի տարբերակ կա, և դրանք սովորաբար Հայաստանից դուրս չեն բերվում։
«Ցուցահանդեսից հետո բոլոր գրքերը մենք կփոխանցենք դեսպանատանը, բացի հազվագյուտ գրքերից։ Կարծում եմ`հետագայում յուրաքանչյուր ոք կարող է գալ ու ծանոթանալ մեր գրքերին», — ասել է փոխնախարարը։
Պողոսյանը նշել է, որ Հայաստանն ու Բելառուսը զարգացնում են գրատպության ոլորտի համագործակցությունը։ «Մենք ձեզանից սովորելու շատ բան ունենք», — նշել է Պողոսյանը։
Բելառուսի գրողների միության ղեկավար Նիկոլայ Չերգինեցն էլ ասել է.
«Աշխարհում ուժ հարկադրելու փոխարեն պետք է խոսք հարկադրել, և մենք աշխատում ենք այդ ուղղությամբ», — ընդգծել է գրողը։
Մինսկում բացված Գրքի միջազգային 23-րդ ցուցահանդեսին մասնակցում են աշխարհի 30 երկրի ներկայացուցիչներ։
