ԵՐԵՎԱՆ, 2 մարտի — Sputnik. Իվետա Մուկուչյանն այս տարի եվրատեսիլյան բեմում կկատարի «LoveWave» ստեղծագործությունը: Երաժշտության համահեղինակները Լևոն եւ Լիլիթ Նավասարդյաններն են, խոսքերի համահեղինակները՝ Իվետա Մուկուչյանը և Սթեֆանի Քրաթչֆիլդը:
Երգն ամբողջությամբ հիմնված է երգչուհու ներաշխարհի, խտացված ապրումների ու զգացմունքների վրա: Սիրո ալիքը մեկ վայրկյանում կարող է փոխել թե՛ մարդուն, թե՛ սեփական կյանքը ճիշտ այնպես, ինչպես երկրաշարժի առաջին ալիքը` Love Wave-ը:
Ինչպես «LoveWave» տեսահոլովակում, այնպես էլ «Եվրատեսիլ 2016»-ի նախապատրաստական և մրցութային փուլում Իվետա Մուկուչյանը կհամագործակցի Kivera Naynomis նորաձևության տան հետ:
Տեսահոլովակում Իվետա Մուկուչյանի զուգընկերը շվեդ հայտնի մոդել, դերասան Բեն Դահլհաուսն է, ով մեծ ճանաչում է վայելում սոցցանցերում: Նա համագործակցել է աշխարհահռչակ ապրանքանիշների հետ, մի շարք ընկերությունների գովազդային դեմքը եղել:
Իվետա Մուկուչյանը Ֆեյսբուքի իր էջում գրել է.
«LoveWave-ը երգ է զգացմունքի մասին, որը կարող է ստեղծել և ոչնչացնել, հզորացնել և թուլացնել, բաժանել և ամբողջացնել: Զգացմունք, որը չի ճանաչում տարածություն և ժամանակ: Օվկիանոսի նման անկանխատեսելի, ալիքի նման հզոր զգացմունք, որի համար արժի պայքարել… Մեր ճանապարհը սկսված է: Եկեք այն անցնեք միասին և տարածենք սիրո ալիքը ամբողջ Եվրոպայում»:
