ԵՐԵՎԱՆ, 11 մարտի-Sputnik. Գոհար Սարգսյան. Սոցիալական պայմանների պատճառով 143 աշակերտ դադարեցրել է ուսումը։ Վերջին տվյալները հրապարակել է Կրթական տեխնոլոգիաների ազգային կենտրոնը։ Sputnik Արմենիայի թղթակիցը նախարարին խնդրեց ներկայացնել խնդրի լուծման տարբերակները։
«Շատ մեծ մտահոգություն ունեմ։ Ես կփորձեմ այդ հարցով զբաղվել։ Եթե այդ թիվն ընդամենը 143-ն է, ապա այդ հարցը հեշտ լուծելի է։ Պիտի փորձենք օգնել, ես կուսումնասիրեմ հարցը»,-ասաց Լևոն Մկրտչյանը։
Նախարարը մեկ անգամ ևս հաստատեց, որ պայքարելու է կրթական հաստատություններում կաշառքի դրսևորումների դեմ։ Սակայն նախարարը կտրուկ որոշումների կողմնակից չէ։
«Ճակատագիր ես խեղում, երբ ուսուցչին ազատում ես աշխատանքից։ Մարդուն պետք է տալ ուղղվելու հնարավորություն։ Իսկ եթե նույն սխալը երկրորդ անգամ է կրկնվում, նոր կարելի է ազատել նրան»,-ասաց նախարարը։
Մկրտչյանը վերահաստատում է այն գաղափարը, որ իր պաշտոնավարման տարիներին պետք է ապաքաղաքականացնի կրթական համակարգը։ Լրագրողներից մեկի այն հարցին, թե ինչպես է նախարարն այդ բարեփոխումն անելու, եթե իշխանության ներկայացուցիչները բուհերի խորհուրդների նախագահներն են, Մկրտչյանը պատասխանեց.
«Աշխարհի շատ երկրներում ազգային համալսարանի խորհրդի նախագահը երկրի առաջին դեմքն է, որպեսզի շեշտի այդ հաստատության համապետական նշանակությունը և ազգային դերակատարումը։ Մնացյալ պարագաներում հարցի լուծումը տեսնում եմ բարձրագույն կրթության օրենքի մեջ, դա նաև մեր միջազգային գործընկերների պահանջն է` արմատապես բարեփոխել համալսարանական ինքնավարության և կառավարման համակարգը»,- ասաց նախարարը։
Կրթության նախարարն անդրադարձավ նաև ներառական կրթությանը։ Դպրոցները համատարած ներառական դարձնելու գործընթացը նա ուզում է անցնցում իրականացնել։
«Վախ ունեմ իմ մեջ, որ եթե մենք անցնենք այդ պլանային համատարածին, այդտեղ կարող ենք կորցնել շատ բան, կարող ենք ժողովրդի մոտ առաջացնել բացասական վերաբերմունք, ի վերջո խոսքը մեր աշակերտության 0.5 տոկոսի մասին է։ Այստեղ շատ նուրբ ու հանգիստ պետք է աշխատել ու արդյունքները ցուցադրել»,-ասաց Մկրտչյանը։
Առաջիկայում Լևոն Մկրտչյանը ծրագրել է առանց նախազգուշացնելու այցելել ավագ դպրոցներ։ Սակայն, նրա հավաստմամբ, դա ոչ թե պատժիչ նպատակներ ունի, այլ միտված է վերհանելու դպրոցների հիմնախնդիրները։ Ամեն շաբաթ նախարարը կգնա երևանյան կամ մարզային դպրոցներ, իսկ երբ դա ձևաչափ դառնա, նրան կփոխարինեն վարչությունների պետերը։
