ԵՐԵՎԱՆ, 30 մարտի-Sputnik. Ստյոպա Սաֆարյանը զբաղվում է քաղաքագիտական գործունեությամբ ու դասախոսություններ է կարդում, բայց նրա խոսքով` միայն այն հաստատություններում, որտեղ ակադեմիական ազատությունն ապահովված է։
«Եթե պարոնայք հանրապետականները գնահատում են իմ դասախոսական կարողությունները, դրա համար շնորհակալ եմ, բայց նաև պիտի հասկանան, որ ես այն դասախոսներից եմ, որ տաբուներ չունի, այս առումով, թերևս, եթե պատրաստ են լսել քննադատություններ, ապա չեմ բացառում»,-ասաց Ստյոպա Սաֆարյանը։
Ստյոպա Սաֆարյանը նաև այն կարծիքին է, որ նման հարցերը հրապարակային չեն քննարկվում, դեռ պետք է հաստատվի կուրսը, դասախոսության կառուցվածքը։ Այնպես որ եթե նա զգա` լսարանն իր դասախոսության կարիքն ունի, ապա չի հրաժարվի առաջարկից։
«Քանի որ սա կուսակցական դպրոց է, ես այնուամենայնիվ պիտի հասկանամ, թե ինչ են ակնկալում լսել, եթե դա ուղղակի քարոզչություն է, ապա ես այդ դաշտում չկամ»,-վստահեցրեց Սաֆարյանը։
Իսկ առհասարակ քաղաքական դպրոցի մասին նա վատ կարծիքի չէ, քանի որ ծանոթ է եվրոպական փորձին։
«Ինչքան էլ թերահավատորեն վերաբերվենք նրան, թե ինչպես կծառայի դպրոցը այն նպատակին, ինչին ծառայում են եվրոպական այլ կուսակցությունների գրասենյակներ, միևնույն է, կրթվելու անհրաժեշտությունը ես միայն կարող եմ ողջունել»,-ասաց նա։
Նրա խոսքով` ավելի լավ է կուսակցությունն այսպես համալրվի նոր անդամներով, քան պարտադրաբար։
