ԵՐԵՎԱՆ, 30 մարտի — Sputnik. Լաուրա Սարգսյան. Իտալացի երաժիշտ Ֆեդերիկո Մոնդելչին Երևան է եկել Հայաստանի պետական կամերային նվագախմբի հետ ելույթ ունենալու համար։ Համերգը նախատեսված է ապրիլի 2-ին Արամ Խաչատրյանի անվան համերգասրահում։
«Անցյալ տարի երևանյան համերգից հետո ես մեկնեցի Ղարաբաղ։ Արդեն տանը` Իտալիայում, ես դեսպանատնից նամակ ստացա, որտեղ նշված էր, որ իմ անունը ներառել են Ադրբեջանի սև ցուցակում»,- Sputnik Արմենիայի թղթակցի հետ զրույցում ասաց Մոնդելչին։
Ծանուցումից հետո նրան զանգել են ու ասել, որ սև ցուցակից կհանեն, եթե ներողություն խնդրի Ադրբեջանից և խոստանա, որ այլևս երբեք չի մեկնի Ղարաբաղ։
«Ես հրաժարվեցի Ադրբեջանից ներողություն խնդրել Ղարաբաղի համար», — ժպտալով ասաց Ֆեդերիկոն և շեշտեց, որ նման երևույթներն իր համար անընդունելի են։
Մոնդելչին այս անգամ Երևանում կներկայացնի «Timeless Melodies» ծրագիրը, որի շրջանակում կհնչեն Թարիվերդիևի, Կոմիտասի, Հարությունյանի, Մանսուրյանի, Բաբաջանյանի, Շոստակովիչի, Իրադիերի ստեղծագործությունները` ադապտացված լարային գործիքների և սաքսոֆոնի համար։
Մաեստրոն նշեց, որ երաժշտությունը սիրել է 4-5 տարեկանում, սակայն 11 տարեկանից է սկսել երաժշտությամբ զբաղվել։
«Մինչ այդ ես իմ երազանքն իրագործելու հնարավորություն չեմ ունեցել»,- խոստովանեց նա։
Ֆեդերիկոն նշեց, որ երաժշտության միջոցով կարողանում է ինքնաարտահայտվել։ Խոստովանում է` եթե երաժիշտ չդառնար, անպայման ուղի կգտներ իրեն այլ մասնագիտություններում դրսևորելու համար։
«Հաճախ եմ նայում աստղերին, աստղազարդ երկնքին։ Այդ պահին ես փորձում եմ ոչ մի բանի մասին չմտածել ու այդ ժամանակ ես հանգստանում եմ»,- ասաց մաեստրոն։
Մոնդելչին գնահատում է հայկական երաժշտությունը, ասում, որ մեծ կոմպոզիտոր Կոմիտասի ստեղծագործություններից սիրում է «Գարունը», «Քելե-քելեն»։
«Հայկական երաժշտությունը սրտառուչ է, իր մեջ թաքցրած բարի թախիծ ունի։ Գալիք համերգը նվիրում եմ Հայոց ցեղասպանության զոհերին», — ասաց Մոնդելչին և նշեց, որ համերգը պետք է կայանար Ցեղասպանության 100-րդ տարելիցի կապակցությամբ։
Ֆեդերիկո Մոնդելչին ժամանակակից ամենահայտնի սաքսոֆոնահարներից է։ Նա բազմաթիվ անգամ ելույթ է ունեցել Գերմանիայում, Իսպանիայում, Ճապոնիայում, ԱՄՆ-ում անցկացված սաքսոֆոնահարների համաշխարհային փառատոներում։
Իտալիայում հանդես է եկել որպես մենակատար հիմնական նվագախմբերի հետ, այդ թվում` «Լա Սկալա» ֆիլհարմոնիկ նվագախմբի հետ։ Հյուրախաղերով շրջում է Եվրոպայում և Ամերիկայում, հանդես է գալիս նաև որպես դիրիժոր։ Երևանից հետո աշխարհահռչակ սաքսոֆոնահարը հերթական շրջագայության կմեկնի։
