ԵՐԵՎԱՆ, 28 ապրիլի — Sputnik. Հայկական բանակը քառօրյա պատերազմի ժամանակ կարող էր գրոհի անցնել, բայց նման գործողություններ չձեռնարկեց, լրագրողներին ասաց Ազգային ժողովի նախագահ Գալուստ Սահակյանը։
«Մենք հարձակողական գործողությունների չենք անցել, պարզապես պաշտպանել ենք մեր դիրքերը»,- ասաց նա։
Սահակյանը չի կարծում, որ դիրք ենք կորցրել. «Դրանք չէի համարի մեզ համար դիրքեր, բայց նաև պատերազմ է, և հնարավոր է մի երկու դիրք կորցնել, հաջորդ անգամ էլ այդ դիրքերը հետ վերցնել»,- ասաց Սահակյանը։
Նա նաև շեշտեց, որ հայկական կողմը զենքի խնդիր չի ունեցել։
«Խոսվում է 80-ական թվականների զենքերի մասին, այդ զենքերը օտարված չեն, դրանք բավականին կառուցողական զենքեր են»,- ասաց ԱԺ նախագահը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում ռազմական գործողությունները դադարեցնելու մասին պայմանավորվածություն է ձեռք բերվել, սակայն երկու կողմերն էլ հայտարարում են, որ փոխադարձ պայմանավորվածությունը պարբերաբար խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
