ԵՐԵՎԱՆ, 29 մայիսի- Sputnik. ԱՄՆ-ի Օհայո նահանգի Ցինցինատի քաղաքի կենդաբանական այգու աշխատակիցները ստիպված են եղել սպանել Խարամբե անունով էգ գորիլային, քանի որ երեք տարեկան մի տղա հայտնվել է կենդանու վանդակում, հաղորդում է ՌԻԱ Նովոստին՝ հղում անելով Ֆրանս Պրեսս գործակալությանը:
Կենդաբանական այգու տնօրեն Թեյն Մեյնարդը հայտնել է, որ երեխան սողացել է վանդակի պատնեշի արանքով և ընկել փոսը: Խարամբե անունով 17-ամյա էգ գորիլան, որն ավելի քան 180 կգ է կշռել, մտել է փոսն ու բռնել երեխային:
Ականատեսների խոսքով՝ կենդանին ճչացող տղային քարշ է տվել վանդակում: Այգու աշխատակիցները կրակել են Խարամբեի վրա տղայի ընկնելուց 10 րոպե անց: Երեխան հիվանդանոց է տեղափոխվել, թեև կյանքին սպառնացող վնասվածքներ չի ստացել:
Ինչպես հայտարարել է Մեյնարդը, կենդաբանական այգու արձագանքման խումբը որոշել է սպանել կենդանուն, քանի որ եթե նրա նկատմամբ հանգստացնող դեղամիջոց կիրառեին, ապա ազդեցությունն անմիջապես չէր լինի:
«Վտանգավոր կենդանիների հետ աշխատանքի հարցերով զբաղվող արձագանքման խմբին թվացել է, որ երեխայի կյանքին վտանգ է սպառնում: Նրանք փրկել են տղայի կյանքը»,- ասել է նա՝ նշելով, որ կենդաբանական այգում նման դեպք երբեք չէր եղել:
Գործակալության տվյալով՝ կենդանաբանական այգում 11 գորիլա կա:
