Թուրքիայի նախագահ Թայիփ Էրդողանը առաջարկել է ստուգել գերմանական խորհրդարանի այն պատգամավորի արյունը, որը Բունդեսթագին առաջարկել է 1915 թվականի Հայոց ցեղասպանությունը ճանաչող բանաձև ընդունել:
«Մի գիտունիկ եկել է, ինչ-որ բան պատրաստել ու ներկայացրել գերմանական խորհրդարանին: Ծնվել ու մեծացել է Գերմանիայում, դու այդ ո՞ր արխիվներում ես եղել, որ այս թեմայից գաղափար ունես: Ու նա իբր թե թուրք է: Ի՞նչ թուրք: Նրա արյունը պետք է լաբորատորիայում ստուգել: Որովհետև այն մարդը, որի երակներում այս ժողովրդի արյունը հոսեր, իր ժողովրդին ցեղասպանության մեջ չէր մեղադրի: Նրանց ինչ-որ մեկը ուղղություն է տալիս վերևից, բայց ինչի՞ համար է անում դա, ահա, թե ինչն է կարևոր»,- Ստամբուլում, Սաբահաթին Զայիմի անվան համալսարանի շրջանավարտների համար ելույթի ժամանակ ասել է Էրդողանը։
Նա հիշեցրել է, որ շատ անգամներ է առաջարկել գիտնականների միջազգային հանձնաժողով ստեղծել, որոնք կհետաքննեն 1915 թվականի դեպքերը:
«Ես արդեն ասել եմ. ահա արխիվները: Եթե հարցը լուծելու նպատակ կա, մենք պատրաստ ենք: Բայց եթե նպատակն այս թեման չարաշահելն է, որպեսզի դրանով մեզ ճնշեն, Թուրքիային հարվածող մահակ դարձնեն, կներեք, բայց մենք դա չենք թողնի»,- ավելացրել է Թուրքիայի նախագահը:
Բունդեսթագի պատգամավորները Հայոց ցեղասպանության վերաբերյալ բանաձևն ընդունեցին հունիսի 2-ին։ «Հայերի և մյուս քրիստոնյա փոքրամասնությունների` 1915թ.-ին իրականացված ցեղասպանության հիշատակի և ոգեկոչման մասին» բանաձևին կողմ քվեարկեց խորհրդարանականների գերակշիռ մեծամասնությունը:
Բունդեսթագի բանաձևի ընդունմանը հաջորդեց այն, որ Թուրքիան հետ կանչեց Գերմանիայում առաքելություն իրականացնող իր դեսպանին:
Թուրքիայի նախագահն էլ հայտարարեց, որ գերմանական խորհրդարանի որոշումը լուրջ ազդեցություն կունենա Թուրքիայի և Գերմանիայի հարաբերությունների վրա:
