ԵՐԵՎԱՆ, 26 հունիսի — Sputnik. Հատկանշական է, որ Ադրբեջանի նախագահ Իլհամ հայտարարությունն արվում է ՀՀ և Ադրբեջանի նախագահների սանկտպետերբուրգյան հանդիպումից ընդամենը օրեր անց, այն դեպքում, երբ այդ հանդիպման ավարտին Սերժ Սարգսյանը, Վլադիմիր Պուտինը և Իլհամ Ալիևը հանդես էին եկել համատեղ հայտարարությամբ, որում վերահաստատել էին հակամարտության գոտում իրավիճակի կայունացմանն ու խաղաղ գործընթացի առաջընթացին նպաստող մթնոլորտի ստեղծմանն ուղղված պայմանավորվածությունները։
Sputnik Արմենիայի հետ զրույցում, մեկնաբանելով Ալիևի հերթական ռազմատենչ հայտարարությունը, ՀՀ ՊՆ մամուլի քարտուղար Արծրուն Հովհաննիսյանը նշեց, որ Ադրբեջանի նախագահի ռազմատենչ հռետորաբանությունը նոր չէ, և արդեն ավելի քան 10 տարի շարունակվում է նույն ոգով։
«Ալիևին մշտապես միջազգային հարթակներում ստիպում են խոսել խաղաղությունից, քանի որ հատկապես հայկական կողմից շեշտվում է հակամարտության խաղաղ կարգավորման անհրաժեշտությունը, սակայն հասնելով իր պետություն, միշտ էլ հռետորիկան փոխվել է` զենք ենք ձեռք բերում, պատերազմ, պատերազմի մասին հայտարարություններ։ Ըստ էության միշտ էլ նույն բանն է»,- ասաց Արծրուն Հովհաննիսյանը։
Հարցին, թե ու՞մ են առավելապես ուղղված Ադրբեջանի նախագահի այս հայտարարությունները` ներքի՞ն, թե՞ արտաքին լսարանին, ՊՆ մամուլի քարտուղարը պատասխանեց. «Դրանք կոնկրետ մի թիրախ չունեն, բազմավեկտոր են և ուղղված չեն միայն ներքին լսարանին»։
Հիշեցնենք, որ նախագահների` Սանկտ Պետերբուրգում կայացած հանդիպման ավարտին հրապարակված համատեղ հայտարարությամբ, որին միացել էր նաև Իլհամ Ալիևը, նրանք իրենց գոհունակությունն էին հայտնում «վերջին շրջանում շփման գծում հրադադարի ռեժիմի պահպանման կապակցությամբ»: Բայց մեկ շաբաթ չանցած, վերադառնալով իր երկիր, Ադրբեջանի նախագահը, փաստորեն, հայտարարում է, որ իր ինքը շարունակելու է պատերազմի պատրաստվել։
