ԵՐԵՎԱՆ, 23 հուլիսի — Sputnik. «Սասնա ծռեր» խումբն ազատ է արձակել վերջին երկու պատանդներին, այս մասին Tert.am-ին տեղեկացրել է Ազգային անվտանգության ծառայության մամուլի կենտրոնի ղեկավար Սամսոն Գալստյանը։
«Պարեկապահակային ծառայության շենքից ազատ են արձակվել վերջին երկու պատանդները՝ ՀՀ փոխոստիկանապետ Վարդան Եղիազարյանը և Երևանի փոխոստիկանապետ Վալերի Օսիպյանը»,- ասաց Ազգային անվտանգության ծառայության մամուլի կենտրոնի ղեկավար Սամսոն Գալստյանը։
Ժամեր առաջ ոստիկանության ՊՊԾ շենքից ազատ էին արձակվել ևս երկու ոստիկաններ։ Այս պահի դրությամբ արդեն «Սասնա ծռեր» խմբի մոտ որևէ պատանդ չկա։
Հիշեցնենք, որ «Սասնա ծռեր» խմբի անդամները հանդիպել են ԱԱԾ տնօրեն Գեորգի Կուտոյանի հետ, և որոշում է կայացվել ազատ արձակել պատանդներին՝ պայմանով, որ ստեղծվելու է մամուլի կետ։ Ոստիկանության վերջին երկու պատանդները` ՀՀ փոխոստիկանապետը և Երևանի փոխոստիկանապետը, ազատ կարձակվեն մամուլի կետի ստեղծման ժամանակ։
