ԵՐԵՎԱՆ, 25 հուլիսի — Sputnik. Վիտալի Բալասանյանը զինվորական է, և երբեք հենց այնպես չի խոսում, պատասխանելով Ալեք Ենիգոմշյանի այն հայտարարությանը, թե Վիտալի Բալասանյանը կոնտեքստից դուրս է փոխանցել Սեֆիլյանի հետ զրույցի բովանդակությունը, այսօր հայտարարեց «Ազգային անվտանգություն» կուսակցության նախագահ Գառնիկ Իսագուլյանը:
«Եթե Ենիգոմշյանն ասում է, որ խոսքը ենթատեքստից հանվել է, նշանակում է այդ մասին խոսակցություն եղել է: Թե ինչպես է դա ընկալել Ենիգոմշյանն՝ իր գործն է: Բացի Վիտալի Բալասանյանից, Ալեք Ենիգոմշյանից ու Ժիրայր Սեֆիլյանից, այնտեղ եղել է ևս մեկը, որը արձանագրել է ամբողջ խոսակցությունը»,- ասաց Իսագուլյանը՝ հրաժարվելով բացահայտել այդ անձի ինքնությունը:
Արձանագրված բոլոր առաջարկներն, ըստ Իսագուլյանի, Վիտալի Բալասանյանը մեկ առ մեկ ներկայացրել է հանրապետության նախագահին, ուստի իր համար անհասկանալի է երեկվա հայտարարությունը, թե զինված խմբի ու իշխանությունների միջև բանակցություններն այսուհետ պետք է վարի Աշոտ Մինասյանը:
«Ես երեկ ամբողջ օրն եղել եմ Աշոտ Մինասյանի հետ, Որևէ մեկն Աշոտ Մինասյանին չի զանգահարել, որևէ մեկը նրանից միջնորդություն չի խնդրել»,- ասաց Իսագուլյանը:
Անդրադառնալով ստեղծված իրավիճակին, Գառնիկ Իսագուլյանն ասաց, որ Հայաստանում առկա քաղաքական, տնտեսական, իրավական, առողջապահական և այլ խնդիրների պայմաններում լուծման այլ ելք չեն տեսել «Սասնա ծռեր» խմբի անդամները, երբ գնացել են այդ քայլին:
«Որևէ մեկը նրանց ահաբեկիչ չի հայտարարում, բայց բոլոր պարագաներում տղաները պետք է հասկական, որ նման կերպ շարունակել չեն կարող, հարկավոր է զենքը վայր դնել»,- կարծում է Իսագուլյանը:
Նա նշեց, որ իշխանություններն անում են ամեն ինչ՝ խնդրի խաղաղ լուծման ու նոր արյունահեղությունը կանխելու համար: Հենց այդ նպատակով էլ, նրա խոսքով, Սերժ Սարգսյանը համաձայնել է հանդիպել Ժիրայր Սեֆիլյանին, նրա հետ քննարկել բոլոր խնդիրները, բայց միայն այն պայմանով, որ «Սասնա ծռերը» վայր դնեն զենքերն ու հանձնվեն:
