ԵՐԵՎԱՆ, 22 նոյեմբերի — Sputnik. «Աերոֆլոտի» դուստր ձեռնարկություններից մեկը` ռուսական «Պոբեդա» ավիաընկերությունը, հրաժարվել է Մոսկվա-Կառլովի Վարի և Դոնի Ռոստով-Երևան չվերթերից։ Այս մասին հայտնի է դարձել Ռոսավիացիայի հրապարակած փաստաթղթերից։
Ավելի վաղ տեղեկացրել էինք, որ «Պոբեդան» ուղևորների, բեռների, ուղեբեռի և փոստի կանոնավոր փոխադրող է նշանակվել Դոնի Ռոստով-Երևան և հակառակ ուղղությամբ (շաբաթական երեք թռիչք իրականացնելու հաճախականությամբ)։
«Պոբեդան» Մոսկվա–Գյումրի չվերթով թռիչքներ իրականացնելու թույլտվություն ունի։ Ավիաընկերությունը կարող է շաբաթական յոթ չվերթ իրականացնել։ «Պոբեդան» նաև Դոնի Ռոստովից Երևան թռիչքներ իրականացնելու թույլտվություն էր ստացել, սակայն ավելի ուշ հրաժարվել էր Երևանի ուղղությամբ թռիչքներից` պարզաբանելով, որ «Զվարթնոց» օդանավակայանում բարձր են սպասարկման գները։
Ընկերության ծառայություններից օգտվող ուղևորներին Գյումրու օդանավակայանից Երևան են տեղափոխում Fly & Bus ծառայության միջոցով
«Աերոֆլոտ» խմբին պատկանող «Պոբեդա» ավիաընկերությունը ստեղծվել է 2014 թվականի սեպտեմբերի 16-ին «Դոբրոլյոտ» փոխադրողի փոխարեն, որը նույն տարվա աշնանը դադարեցրել է թռիչքները Եվրամիության պատժամիջոցների ցուցակում հայտնվելուց հետո: «Պոբեդան» գործում է Մոսկվայի «Վնուկովո» օդանավակայանում։ 2016 թվականի հունվար-սեպտեմբեր ամիսների արդյունքներով` ավիաընկերությունը սպասարկել է 3.3 մլն ուղևոր: Ռոսավիացիայի տվյալների համաձայն` փոխադրողն այս ցուցանիշով ՌԴ քաղավիացիայում 6-րդ տեղն է զբաղեցրել:
