ԵՐԵՎԱՆ, 23 փետրվարի — Sputnik. 13-ամյա հայ երգիչ Արտյոմ Սեյրանյանը նախօրեին ռուսական առաջին ալիքով ցուցադրվող «Голос. Дети» շոուի ընթացքում «կույր» լսումների ժամանակ կատարեց AC/DC ռոք-խմբի հայտնի «Highway to hell» սինգլը։
Արտյոմն այնպիսի եռանդով կատարեց երգը, որ ստիպեց միանգամից շրջվել Դիմա Բիլանին և Նյուշային։ Ժյուրիի անդամները անթաքույց հրճվանքով հետևում էին նրա ելույթին։ Տղան բավական վստահ էր իրեն պահում բեմում և հիանալի ռիթմի զգացողություն ուներ։ Ելույթից հետո դահլիճը վանկարկում էր. «Կեց-ցես»։
«Կոճակը չսեղմեցի միայն նրբանկատությունից ելնելով, ինձ էլ դուր եկավ համարը»,- ասաց Վալերի Մելաձեն ժյուրիի անդամներին և նշեց, որ երգը Արտյոմի ծնողների սերնդակիցների երգ է։
«Դու նման երաժշտություն լսու՞մ ես»,- զարմացած հարցրեց նա, ինչին ի պատասխան երգչուհի Նյուշան ասաց. «Նա պարզապես հաճույք էր ստանում իր ելույթից»։
Դիմա Բիլանն իր հերթին նշեց, որ «դա ինչ-որ անհավատալի բան էր»։ Անկախ նրանից, որ Նյուշան փորձում էր տղային իր թիմ տանել, Արտյոմն, այդուամենայնիվ, ընտրեց Դիմա Բիլանին։
