ԵՐԵՎԱՆ, 13 մայիսի — Sputnik. Ռուսաստանը հասկանում է, որ միայն Իրանի և Թուրքիայի օգնությամբ հնարավոր չէ զինադադարի ռեժիմ սահմանել սիրիական կառավարության և ընդդիմության միջև, այդ պատճառով էլ ՌԴ-ն ԱՄՆ-ի և Պարսից ծոցի երկրների օգնության կարիքն ունի, Sputnik Արմենիա մամուլի կենտրոնում ասաց արաբագետ Արմեն Պետրոսյանը։
Գնահատելով Սիրիայում տիրող իրավիճակը ՝ արաբագետն առանձնացրեց երեք հիմնական գործընթաց։
«Առաջինը հակաահաբեկչական պայքարն է, երկրորդը՝ Ռուսաստանի առաջարկությամբ բախումնազերծ գոտիների ստեղծումը, ինչպես նաև հակակառավարական տարբեր խմբավորումների հետ ներքին բախումները», — ասաց Պետրոսյանը։
Տվյալ փուլում, նրա կարծիքով, ամենակարևորը հատուկ գոտիների ստեղծման գործընթացն է: Հյուսիսում բախումնազերծ գոտիներ կստեղծվեն Իդլիբ, Համա, Լաթակիա և Հալեպ նահանգներում, կենտրոնում՝ Հոմսում, Դամասկոսի Հարավային Ղութա թաղամասում, հարավում՝ Ալ Կունայթրա և Դարա նահանգներում։
Պետրոսյանի կարծիքով՝ այդ գործընթացը Սիրիայում խաղաղություն հաստատելու ռուսական ծրագրի թարմացումն է, դրա տրամաբանական շարունակությունը։
«Ռուսաստանն աշխատում է, որ այդ գործընթացի մեջ ներգրավի ոչ միայն Թուրքիային և Իրանին, այլ նաև ուրիշ գործող կողմերի՝ ԱՄՆ-ին, Հորդանանին և Պարսից ծոցի երկրներին, մասնավորապես՝ Սաուդյան Արաբիային», — ասաց Պետրոսյանը։
Նրա խոսքով՝ ռուսական կողմը հասկանում է, որ գործող դերակատարների հետ անհնար է հրադադարի ռեժիմը պահպանել և պայմաններ ստեղծել սիրիական հակամարտության լուծման համար։
Ընդ որում՝ գործողությունների մեջ ներառված երկրները որոշակի ազդեցություն կստանան բախումնազերծ գոտիներում։ Ամենայն հավանականությամբ, Թուրքիան՝ Իդլիբում, Իրանը՝ Հալեպում, Ռուսաստանը՝ Լաթակիայում, Հոմսում և Դամասկոսում (հնարավոր է, Պարսից ծոցի երկրների մասնակցությամբ)։ Հարավում կայունություն ապահովելու համար Ռուսաստանը ցանկանում է ներգրավել Պարսից ծոցի երկրներն ու ԱՄՆ-ն։
Գոտիները կսկսեն գործել հունիսի սկզբից և կենթադրեն համապատասխան երկրների որոշակի ուժային ներկայացուցչությունների առկայություն։
«Գոտիների ստեղծում, առաջին հերթին, ուղղված է հումանիտար իրավիճակի բարելավմանը, քանի որ այդ շրջաններում ապրում է ավելի քան երեք միլիոն մարդ», — ասաց Պետրոսյանը։
Այդ քայլը թույլ կտա նաև տարբերակել ընդդիմությանն ու ծայրահեղ իսլամիստներին, նաև ազատել կառավարական ուժերի մի մասին, որը զբաղված է ընդդիմադիր խմբակցությունների դեմ պայքարով։
Այս ամենն, արաբագետի կարծիքով, կնպաստի Սիրիայի հետ քաղաքական երկխոսության հաստատմանը։
Սիրիայում զինադադարի երաշխավոր երկրների (ՌԴ, Իրան, Թուրքիա) ներկայացուցիչներն Աստանայի միջազգային բանակցությունների՝ մայիսի 4-ին կայացած հերթական փուլի ընթացքում հուշագիր են ստորագրել Սիրիայում անվտանգության չորս գոտիների ստեղծման վերաբերյալ: Հուշագրի համաձայն՝ մայիսի 6-ից այս գոտիներում կդադարեն բոլոր բախումները կառավարական զորքերի և զինված խմբավորումների միջև:
