ԵՐԵՎԱՆ, 23 մայիսի – Sputnik. ԱՄՆ Կալիֆոռնիա նահանգում կֆինանսավորվի պատմասոցիալական գիտությունների կրթական ծրագիրը, որը ներառելու է կրթական ծրագրեր Հայոց ցեղասպանության ու պատմական այլ կարևոր դեպքերի վերաբերյալ:
Այդ նպատակով սենատի կրթության բյուջետային ենթահանձնաժողովին կտրամադրվի հավելյալ 16 մլն ԱՄՆ դոլար: Այս մասին, ինչպես տեղեկացնում է Հայ դատի ԱՄՆ հանձնախումբը, հայտարարել է Սենատոր Էնթոնի Պորտանտինոն:
«Ես հպարտ եմ, որ օգնել եմ շարունակել ջանքերը՝ ապահովելու ճշգրիտ ու համապատասխան կրթություն Կալիֆոռնիայի ուսանողների համար: Ես հատկապես ուրախ եմ, որ այս բյուջետային հատկացումները ներառում են Հայոց ցեղասպանության մասին կրթական չափորոշիչների կիրառում: Հայոց ցեղասպանության մասին պատմական տեղեկությունները համաշխարհային պատմության ողբերգական ու կարևոր մասն են, որոնք շարունակում են առերեսվել ժխտման ու կազմակերպված ընդդիմության հետ: Մեր դպրոցներում դրանց ուսուցումը տեղին է»,- ասել է Պորտանտինոն:
Նախորդ տարի Կալիֆոռնիայի սենատի կրթական հանձնաժողովը ընդունել էր նոր պատմասոցիալական գիտության կրթական ծրագիր, որն ուղեցույցներ էր պարունակում հանրային դպրոցների ուսուցիչների համար: Դա նպաստել է Հայոց ցեղասպանության մասին տեղեկացվածության մակարդակի զգալիորեն բարձրացմանը:
