ԵՐԵՎԱՆ, 16 հունիսի — Sputnik. Պոլսո Հայոց պատրիարքական տեղապահ Գարեգին արքեպիսկոպոս Բեքչյանը, որը գտնվում է Գերմանիայում, հունիսի 20-ին կվերադառնա Ստամբուլ: Այս մասին նա հայտնել է «Ակոս» պարբերականին:
«Ստամբուլ վերադառնալուն պես ակնկալում եմ, որ Արամ սրբազանն ինձ կներկայացնի գրավոր հրաժարականի դիմումը: Հրաժարականի մասին հայտարարությունը մամուլի միջոցով կտարածենք մեր համայնքի անդամներին»,- հայտնել է Բեքչյանը:
Նա տեղեկացրել է, որ Ստամբուլ վերադառնալուց հետո առաջին գործը լինելու է Հոգևոր խորհուրդ գումարելը:
«Խորհրդի նիստից հետո կհանդիպենք Ստամբուլի նահանգապետարանի հետ ու նրանց կհայտնենք մեր որոշումները: Դրանից հետո մեկ այլ ժողով կգումարենք Նախաձեռնող մարմին կազմելու համար»,- ասել է նա:
Գերմանիայի Հայոց թեմի առաջնորդ Բեքչյանը մարտի 15-ին Պոլսո պատրիարքարանի հոգևոր խորհրդում պատրիարքական տեղապահ էր ընտրվել, սակայն նրա ընտրվելուց հետո Արամ արքեպիսկոպոս Աթեշյանը հրաժարվել էր թողնել պատրիարքական փոխանորդի պաշտոնը, ինչի հետևանքով լարված իրավիճակ էր ստեղծվել պատրիարքարանում:
Աթեշյանը միայն մայիսի 24-ին հայտարարեց հրաժարական տալու մասին՝ Բեքչյանին պաշտոնապես հրավիրելով Ստամբուլ: Բեքչյանը մեկնել էր Գերմանիա և հայտարարել, որ եթե պատրիարքական ընտրության հետ կապված որևէ հստակ զարգացում չլինի, ինքը Ստամբուլ չի վերադառնա։
