ԵՐԵՎԱՆ, 13 սեպտեմբերի — Sputnik. Փաստաբանների պալատի նախագահը հարգում է Գասպարիին։ Այս մասին այսօր լրագրողների հետ զրույցում հայտարարեց Արա Զոհրաբյանը։
«Հրահանգել եմ, որ լավ վերաբերվեն։ Եթե սուրճ է ուզում, սուրճ հյուրասիրեն, ջուր է ուզում` ջուր տան։ Ես ինքս էլ հարգում եմ նրա արածը»,– ասաց Զոհրաբյանը` անդրադառնալով սեպտեմբերի 9-ին ակտիվիստ Վարդգես Գասպարիի` Փաստաբանների պալատի դիմաց անցկացրած բողոքի ակցիային։
Ինչ վերաբերում է Գասպարիի ակցիայի վերաբերյալ հնչած վիրավորական ու ծաղրական մեկնաբանություններին, Արա Զոհրաբյանը դրանք «հումոր» որակեց։ «Հաջող, թե անհաջող, չորակեմ, բայց հումորի շարքից էր»,– ասաց ՓՊ նախագահը։
Հիշեցնենք, սեպտեմբերի 9-ին, Փաստաբանների Պալատի նախագահի ընտրության օրը Վարդգես Գասպարին հերթական բողոքի ակցիան էր իրականացրել` պառկելով պալատի շենքի մուտքի դիմաց։ Նրա ձեռքում պահված պլակատի վրա գրված էր. «Փաստաբանների պալա՞տ է, թե՞ դատախազության գործակալություն»։
Ավելի ուշ Գասպարիի ակցիան սոցիալական կայքերում տարատեսակ մեկնաբանությունների ու որակումների արժանացավ։
