ԵՐԵՎԱՆ, 19 սեպտեմբերի — Sputnik. Հատուկ քննչական ծառայությունը պարզել է, որ մի շարք քաղաքացիների` ոստիկանության և քննչական կոմիտեի աշխատակիցներին ուղղված մեղադրանքներ կեղծ են։ Կեղծ մատնություն կատարած քաղաքացիների նկատմամբ էլ այդ փաստով քրեական գործեր են հարուցվել։ Այս մասին նշված է Հատուկ քննչական ծառայության կայքում։
Այսպես, Տավուշի մարզի ընդհանուր իրավասության դատարանում վկա Արամ Ղուկասյանը հրաժարվել էր իր նախաքննական ցուցմունքից և հայտնել, որ ոստիկանության Դիլիջանի բաժնում տեսուչներ Թաթուլ Մանթաշյանը, Ռուստամ Ամիրխանյանը և մի շարք այլ ոստիկաններ իրեն տևական ժամանակ ապօրինի պահել են ոստիկանությունում և խոշտանգել, որից հետո ինքն առանց կարդալու ստիպված ստորագրել է հարցաքննության արձանագրությունը:
Հատուկ քննչական ծառայությունը պարզել է, որ Ա. Ղուկասյանը դատարանում ստել է, և նրա նկատմամբ քրեական գործ է հարուցել։
Տավուշի մարզի նույն դատարանում քննվող մեկ այլ քրեական գործով էլ տուժող Սերգեյ Միքայելյանը հայտարարել էր, որ Քննչական կոմիտեի քննիչ Սմբատ Սաղաթելյանի կազմած հարցաքննության արձանագրության էջերին դրված ստորագրություններն իրենը չեն, և որ ինքն ընդհանրապես չի հարցաքննվել ու ցուցմունք չի տվել։
Հատուկ քննչական ծառայությունը, սակայն, դատաձեռագրաբանական փորձաքննության արդյունքում հիմնավորվել է, որ Ս. Միքայելյանը ստում է։ Նրա նկատմամբ այս հիմքով քրեական գործ է հարուցվել։
Մյուս քրեական գործն էլ հարուցվել է դատարանում քննվող քրեական գործով վկա Հայկ Ղուկասյանի կողմից սուտ մատնություն կատարելու հիմքով: Ղուկասյանը դատարանին հայտնել է, որ ՔԿ քննիչներ Վարդան Կարապետյանն ու Ռուբեն Մարտիկյանը կեղծել են քրեական գործի ապացույցները, իսկ ոստիկանության և քննչական կոմիտեի Դիլիջանի բաժինների աշխատակիցները խոշտանգել են իրեն` հարցաքննության արձանագրության մեջ ներառելով իր կողմից չհայտնած տեղեկություններ, նաև սխալ են գրել հարցաքննության օրն ու ժամը։
Հայկ Ղուկասյանի հայտնած տեղեկությունները նույնպես հերքվել են։ Նրա նկատմամբ ևս հարուցվել է քրեական գործ` սուտ մատնության հիմքով։
