ԵՐԵՎԱՆ, 25 սեպտեմբերի — Sputnik, Խաչիկ Չախոյան. Սպիտակ խաղաքարերով այսօր խաղացող Լևոն Արոնյանը որոշակի առավելություն ուներ: Բայց չինացի մրցակիցը կարողացավ պաշտպանվել ու հաշիվը այս մրցավեճում դարձավ՝ 1,5: 1,5:
Վաղը շախմատիստները կանցկացնեն դասական շախմատի վերջին՝ չորրորդ պարտիան: Սև խաղաքարերով հանդես է գալու Լևոն Արոնյանը: Ամենայն հավանականությամբ, հայ շախմատիստի լարումն ավելացնում է նաև այն հանգամանքը, որ առաջիկա շաբաթ օրը նրա հարսանիքն է լինելու:
Անկախ ամեն ինչից հարսանիքն, իհարկե, կկայանա, իսկ մինչ այդ հայտնի կդառնա շախմատի աշխարհի գավաթի խաղարկության հաղթողը: Դասական շախմատի վերջին պարտիայից հետո, եթե գրանցվի ոչ-ոքի արդյունքը` կողմերը երկու պարտիա կանցկացնեն արագ շախմատում սեպտեմբերի 26-ին: Նույն օրը, եթե նորից ոչ ոքի գրանցվի, կնշանակվի նրանք կխաղան կայծակնային շախմատի երկու պարտիա, և, վերջապես, եթե այստեղ էլ կողմերը հաղթողին չորոշեն, ապա կանցկացվի «մահվան» պարտիան:
Իսկ թե ինչ տրամադրությամբ Լևոն Արոնյանը կներկայանա իր հարսանեկան հանդեսին ցույց կտա ժամանակը:
