ԵՐԵՎԱՆ, 27 սեպտեմբերի — Sputnik, Լաուրա Սարգսյան. ՀՀ ԱԺ նախագահ Արա Բաբլոյանի գլխավորությամբ հայկական պատվիրակության պաշտոնական այցը շատ կարևոր է հայ-վրացական հարաբերությունների համար, կարծում է Հայաստանի պետական կառավարման ակադեմիայի Տարածաշրջանային հետազոտությունների կենտրոնի գիտաշխատող, Վրաստանի հարցերով փորձագետ Ջոնի Մելիքյանը։
«Այցը կարևոր է ոչ միայն նրա համար, որ Բաբլոյանն առաջին անգամ է այս պաշտոնում Վրաստան այցելում։ Ուղղակի, ինչպես Վրաստանում, այնպես էլ Հայաստանում ուժեղանում է խորհրդարանի դերը։ Հարաբերություններն անցնում են նոր` խորհրդարանական մակարդակի համագործակցության», – ասել է Մելիքյանը։
Խորհրդարանական դիվանագիտության և բարեկամության խմբի դերը Թբիլիսիում անցկացրած համատեղ ճեպազրույցի ժամանակ ընդգծել են նաև Հայաստանի և Վրաստանի խորհրդարանի նախագահներ Արա Բաբլոյանն ու Իրակլի Կոբախիձեն։ Նրանք նշել են` Հայաստանի և Վրաստանի բազմադարյա եղբայրական հարաբերությունները որակապես նոր փուլ են թևակոխել։
Հայաստանի պատվիրակության հետ հանդիպմանը Վրաստանի իշխանությունները նշել են հայկական խորհրդարանի նախագահի այցի կարևորությունը երկու երկրների հարաբերությունների համար։ Առաջին հայացքից քննարկվող թեմաների և հարցերի օրակարգը գրեթե նույնն էր և մյուս այցերից չէր տարբերվում. առևտրա–տնտեսական հարաբերությունների խորացում, զբոսաշրջության և մշակույթի ոլորտում հարաբերությունների զարգացում և այլն։ Սակայն խորհրդարանների ղեկավարների մակարդակով Թբիլիսիում անցկացրած այս հանդիպումը ընդգծեց` Երևանն ու Թբիլիսին խոսքից գործի են անցնում։
«Երկրներն այսօր, ինչպես երբեք, ցանկանում են խորացնել երկկողմ հարաբերությունները, սակայն արդեն խորհրդարանական մակարդակով։ Նախկինում թղթի վրա ամրագրած նախագծերն ու ծրագրերը կսկսեն իրականացվել», – ասաց Մելիքյանը։
Նա համոզված է, որ այս աշունը երկու երկրների հարաբերություններում թեժ կլինի` լի համատեղ այցերով, նախագծերով և հայ-վրացական համագործակցության խորացման գաղափարներով։
Հիշեցնենք, որ ՀՀ ԱԺ նախագահ Արա Բաբլոյանի գլխավորած պատվիրակությունը պաշտոնական այցով Վրաստան է այցելել սեպտեմբերի 25-ին։
Երկու երկրների խորհրդարանների ղեկավարներն այցելությունը խորհրդանշական են անվանել, քանի որ կողմերը նշել են դիվանագիտական հարաբերությունների հաստատման 25-ամյակը։ Հայկական պատվիրակությունը հանդիպում է ունեցել նաև երկրի նախագահ Գեորգի Մարգվելաշվիլիի, ինչպես նաև արտգործնախարար Միխեիլ Ջանելիձեի և վարչապետ Իրակլի Կվիրիկաշվիլիի հետ։
Հայ–վրացական դիվանագիտական հարաբերությունները հաստատվել են 1992 թվականի հուլիսի 17-ին` համապատասխան համաձայնագրի ստորագրմամբ։
