ԵՐԵՎԱՆ, 27 սեպտեմբերի – Sputnik. Թբիլիսիում ընթացող շախմատի աշխարհի գավաթի խաղարկության եզրափակիչում այսօր կայանում են արագ շախմատի պարտիաները: Առաջին պարտիայում Լևոն Արոնյանը գեղեցիկ ոճով հաղթանակ տոնեց ու հաշվի մեջ առաջ անցավ չինացի Լիրեն Դինգի հետ խաղում:
Սպիտակ խաղաքարերով գործող Արոնյանը պարտիայի սկզբից ուղիներ էր փնտրում հաղթանակի հասնելու համար ու պատրաստված կոմբինացիայով վերջապես գտավ հաղթական ճանապարհը:
Աշխարհի գավաթակրի կոչումից հայ շախմատիստին բաժանում է մեկ պարտիա: Այսօր կողմերը կանցկացնեն նաև արագ շախմատի երկրորդ պարտիան, որում Լևոն Արոնյանն արդեն խաղալու է սևերով: Եզրափակիչում հայ շախմատիստն առջևում է 3:2 հաշվով, ու հաջորդ պարտիայում ոչ-ոքին Արոնյանին կբերի մրցումների հաղթողի կոչումը:
