ԵՐԵՎԱՆ, 30 սեպտեմբերի — Sputnik. Հայաստանը զգալի ներդրում է ունեցել եվրոպական մշակույթի մեջ, ՀՀ-ում ու Արցախում «Եվրոպական ժառանգության օրերի» բացման ժամանակ լրագրողներին ասաց Հայաստանում ԵՄ պատվիրակության ղեկավար Պյոտր Սվիտալսկին։
«Եվրոպական ժառանգության օրերն» այս տարի անցնում են «Ժառանգությունը և բնությունը» կարգախոսով։ Ծրագիրը մեկնարկեց սեպտեմբերի 30-ին Հայաստանի Լոռու մարզում։
Սվիտալսկին նշեց, որ ԵՄ-ի համար սա լավ առիթ է ցույց տալու՝ ինչքան մեծ է Հայաստանի ներդրումը ընդհանուր եվրոպական ժառանգության մեջ։
«Առանց հայկական մասնակցության եվրոպական մշակույթը շատ ավելի աղքատ կլիներ։ Եվրոպայի ճարտարապետական ֆակուլտետների ուսանողների պարտադիր ծրագրում է «Զվարթնոց» տաճարի ուսումնասիրությունը, կոնսերվատորիայում անպայման ուսումնասիրում են Կոմիտասի արվեստը և այլն», — ասաց նա։
Սվիտալսկու խոսքով՝ ԵՄ-ն ցանկանում է ամրապնդել մշակութային կամուրջները Հայաստանի և այլ երկրների միջև։ Նա նշեց, որ նախատեսվում է Հայաստանի կառավարության հետ համատեղ նոր ծրագրեր իրականացնել։
Հայաստանի մշակույթի նախարար Արմեն Ամիրյանն իր հերթին նշեց, որ այս օրերին իրենց դռները կբացեն Ազգային ժողովը, կառավարությունը, Ա. Սպենդիարյանի անվան օպերայի և բալետի ազգային թատրոնը, Երևանի կոնյակի գործարանը։
«Այդ շենքերը սովորաբար անհասանելի են, բայց դրանք մեր ժառանգության կարևոր մասն են կազմում ու իրենց դռները կբացեն սովորական քաղաքացիների համար», — ասաց Ամիրյանը։
«Եվրոպական ժառանգության օրերն» անցկացվում են ամեն տարի աշխարհի 50 երկրում։ Ավելի քան 70 հազար մշակութային միջոցառում է անցկացվում ամբողջ Եվրոպայում՝ եվրոպական մշակույթի մասին տեղեկացվածությունը բարձրացնելու, դրա բացառիկությունն ու զանազանությունը, պահպանման կարևորությունն ընդգծելու համար։
