ԵՐԵՎԱՆ, 13 հոկտեմբերի — Sputnik. Թուրքիայի նախագահ Ռեջեփ Թայիփ Էրդողանը կարծում է, որ սիրիական Իդլիբում գործողություններ սկսած Անկարայի գործողությունները կասկածի տակ դնելու իրավունք ոչ ոք չունի, հայտնում է Sputnik-ը։
«Այս գիշեր թուրքական ԶՈՒ-ն և Սիրիայի ազատ բանակի ջոկատները համատեղ գործողություններ են սկսել իրականացնել Իդլիբում», — ասել է Էրդողանը` ելույթ ունենալով «Արդարություն և զարգացում» կուսակցության մարզային գրասենյակների ղեկավարների հետ հանդիպմանը։
Նա նշել է, որ Թուրքիան պարտավոր է միջոցներ ձեռնարկել, քանի որ սահմանակցում է Իդլիբին։ Էրդողանի խոսքով` ոչ ոք չի կարող Անկարային քննադատել նրա արածի համար։
«Սիրիայի հետ մեր սահմանի երկարությունը կազմում է 911 կմ, և հենց մենք ենք գտնվում մշտական սպառնալիքի պայմաններում։ Այդ պատճառով էլ որևէ մեկն իրավունք չունի կասկածի տակ դնելու մեր գործողությունները», — ասել է Էրդողանը։
Թուրքիայի զորքերը պաշտոնապես Սիրիա են մտել 2016 թվականի օգոստոսին` «Եփրատի վահան» գործողությամբ։ Անկարայի նպատակը Սիրիայի հետ սահմանամերձ տարածքում, որը մինչ այդ զբաղեցրել էին ԻՊ ահաբեկիչներն ու YPG քուրդ ջոկատները, անվտանգության գոտու ստեղծումն էր։ Գործողություններն ավարտվեցին 2017 թվականի մարտի վերջին։
Սիրիայում զինված հակամարտությունը շարունակվում է 2011 թվականի մարտից։ Սիրիական ճգնաժամի կարգավորման վերաբերյալ բանակցություններն ընթանում են Աստանայում և Ժնևում։ «Աստանա» հարթակում բանակցություններն անցկացվում են հունվարից, արդեն իսկ հանդիպումների 6 փուլ է եղել` հունվարին, փետրվարին, մարտին, մայիսին, հուլիսին և սեպտեմբերին։
Բանակցությունների հիմնական արդյունքը եղավ այն, որ համաձայնեցվեց մարտական գործողությունների դադարեցման ռեժիմի մոնիտորինգային խումբ ստեղծելու դրույթը և երաշխավոր երկրները (Ռուսաստան, Թուրքիա և Իրան) Սիրիայում դեէսկալացիայի գոտու ստեղծման մասին հուշագիր ստորագրեցին։
