ԵՐԵՎԱՆ, 10 փետրվարի — Sputnik. Այսօր առավոտյան ՀՀ Արագածոտնի մարզի Իրինդ գյուղում գայլերի ոհմակը հոշոտել է ոչխարների հոտը։ Հոտի տերը վաղ առավոտյան գնացել է, որ գոմի դուռը բացի, տեսել է` ամբողջ հոտը կոտորած է։ Sputnik Արմենիայի հետ զրույցում պատմեց Իրինդի գյուղապետ Բարսեղ Հեբոյանը։
Նրա խոսքով` հեռվից նկատել է գայլերին, մտածել է` շներ են, բայց երբ մոտեցել է, հասկացել է, որ գայլերի ոհմակ է, արագ հեռացել է։
«Չգիտեն, թե գայլերն ինչպես են կարողացել մտնել գոմ, ինչպես են բացել գոմի դուռը»,- ասաց գյուղապետը` հավելելով, որ անասնագոմը գյուղի ծայրին է, սարի տակ։ Գայլերը գյուղապետի կարծիքով, հենց սարից էլ իջել են ու մտել առաջին հանդիպած գոմը։
Միայնակ անկարող լինելով չեզոքացնել գայլերին` գյուղացին դիմել է գյուղապետին, գյուղապետն էլ` մարզպետարան։
Մարզպետարանից դեպքի մասին հայտնել են ԱԻՆ, և միայն դեպքի վայր մեկնած հրշեջ-փրկարարական ջոկատի օպերատիվ խմբի ջանքերով է հաջողվել չեզոքացնել վայրի կենդանիներին։
Հեբոյանը տեղեկացրեց, որ գայլերը կոտորել են գոմում եղած 13 ոչխարներին ու 5 գառներին։
«Ոչխարներն էլ հղի էին, շուտով պիտի ծնեին։ Հիմա այդ խեղճ մարդիկ բոլոր մանր անասուններին կորցրին»,- ասաց նա Հեբոյանը։
Տուժած բազմանդամ ընտանիքը, գյուղապետի խոսքով` փոխհատուցման հույս ունի։ Բայց Հեբոյանը դժվարացավ միանշանակ ասել` կստանան, թե ոչ։
