ԵՐԵՎԱՆ, 22 մարտի — Sputnik. Հայաստանում առաջին անգամ ժայռամագլցման բաց առաջնություն անցկացվեց, հաղթողների անուններն արդեն հայտնի են։ Երրորդ տեղը զբաղեցրին Արեգ Սահակյանն ու Անի Սիսակյանը, երկրորդ տեղում են Արտավազդ Բոյաջյանն ու Անուշկա Խաչատրյանը, առաջին տեղում` Լևոն Մովսիսյանն ու Էմմա Կոստանյանը։
Ինչպես Sputnik Արմենիային տեղեկացրին Ալպինիզմի և լեռնային տուրիզմի հայկական ֆեդերացիայից` միջոցառմանը 60 լեռնագնաց էր մասնակցում` 30 աղջիկ և 30 տղա։
«Միջոցառումներն անցկացվեցին Հայաստանի և Իրանի ալպինիզմի ֆեդերացիաների համատեղ ուժերով։ Մեր համագործակցությունը սկսվեց այն բանից հետո, երբ 2015 թվականին համապատասխան հուշագիր ստորագրվեց»,- ասաց Ալպինիզմի և լեռնային տուրիզմի հայկական ֆեդերացիայի փոխնախագահ Սուրեն Դանիելյանը։
Արդյունքում ալպինիզմի հայկական ակումբներից մեկն իրանական կողմին առաջարկել է Հայաստանում մրցումներ անցկացնել։ Երևան ժամանած իրանցի հրահանգիչ մասնագետները իրենց հաշվին հատուկ մրցուղի են կառուցել։ Բացի դա, ինչպես նշեց Դանիելյանը, ժյուրիի անդամները ևս իրանցիներն էին։
Կին մրցավարը հետևում էր աղջիկներին, իսկ տղամարդ մրցավարը` տղաներին։ Մրցույթում հաղթանակը նախևառաջ Հայաստանի և Իրանի ալպինիզմի ֆեդերացիաների կողմից լավագույնը ճանաչված լեռնագնացներին է տրվել։
«Նրանք արդեն Հայաստանի չեմպիոններ են համարվում, և դա նրանց հնարավորություն է տալիս հետագայում տարբեր միջազգային մրցումների մասնակցել»,- հավելեց մեր զրուցակիցը։
Մրցույթին կարող էին մասնակցել 18 և ավելի բարձր տարիքի երիտասարդները։ Մասնակիցները պետք է հաղթահարեին մրցույթի երկու փուլը` ցուցադրելով լեռնագնացի հմտությունները։
