ԵՐԵՎԱՆ, 29 մարտի — Sputnik. Այսօր կառավարությունը որոշում է կայացրել այս տարի Երևանի օրը ոչ թե հոկտեմբերի 13-ին, այլ սեպտեմբերի 29-ին և 30-ին նշելու վերաբերյալ:
Այս մասին տեղեկացնում է ՀՀ կառավարության տեղեկատվության և հասարակայնության հետ կապերի վարչությունը՝ նշելով, որ առաջարկի հեղինակը Երևանի քաղաքապետ Տարոն Մարգարյանն է:
«2018 թվականի սեպտեմբերի 29-ին և 30-ին Երևանի օրը նշելու և Երևանի հիմնադրման 2800-ամյակին նվիրված «Էրեբունի-Երևան» տոնական միջոցառումների մասին» որոշումով առաջարկվում է տեղափոխել Երևանի օրը՝ հաշվի առնելով նաև 2018 թվականի հոկտեմբերին ՀՀ-ում կայանալիք Ֆրանկոֆոն պետությունների և կառավարությունների ղեկավարների գագաթնաժողովի կապակցությամբ իրականացվող միջոցառումների ծավալը, դրանց պատշաճ իրականացնելու անհրաժեշտությունը և պահանջվող ժամանակը»,- նշված է հաղորդագրության մեջ:
Ի դեպ, հաշվի առնելով, որ այս տարի նշվելու է Երևանի հիմնադրման հոբելյանական 2800-ամյակը, որին կմասնակցեն բազմաթիվ հյուրեր այլ երկրներից, այդ թվում՝ Երևանի քույր քաղաքներից, սփյուռքահայեր և այլն՝ առաջարկվում է Երևանի օրվան նվիրված միջոցառումներն իրականացնել ոչ թե մեկ օր, այլ երկու օր: Այսինքն՝ երկու օր ու գիշեր Երևանը ցնծությամբ տոնելու է աշխարհի հնագույն մայրաքաղաքի կառուցման օրը՝ տարատեսակ մշակութային և հասարակական միջոցառումներով:
