ԵՐԵՎԱՆ, 25 ապրիլի — Sputnik. Ապրիլի 25-ին, ժամը 15.00-ի սահմաններում կալանավորների զբոսանքի տրամադրման ժամանակ «Նուբարաշեն» քրեակատարողական հիմնարկի մի խումբ կալանավորված անձինք, բռնություն գործադրելով ՔԿՀ-ի անվտանգության ապահովման բաժնի աշխատակցի նկատմամբ, նրա ձեռքից խլելով բանտային բանալին, դուրս են եկել թիվ 6 մասնաշենքի միջանցք և բացել թվով 6 խցերի դռները:
Այս մասին տեղեկություն է հրապարակված ՀՀ դատախազության պաշտոնական կայքում։
Այնուհետև այդ խցերում գտնված այլ կալանավորների հետ փորձել են դուրս գալ մասնաշենքից և դիմել փախուստի, սակայն չեն հասցրել. նրանց գործողությունները կանխվել են քրեակատարողական հիմնարկի ծառայողների կողմից:
Դեպքի առթիվ հարուցվել է քրեական գործ:
Նախաքննություն կատարելու համար քրեական գործն ուղարկվել է ՀՀ քննչական կոմիտե:
ՀՀ դատախազությունն արձանագրում է, որ հանրապետությունում ձևավորված լարված իրավիճակը նպաստավոր պայմաններ է ստեղծում հանցածին իրավիճակի, հատկապես հանցավոր հակումներ ունեցող անձանց ակտիվացման համար՝ էապես վտանգելով հասարակական անվտանգությունը՝ իր ազդեցությունն ունենալով հանցավորության դեմ պայքարի արդյունավետության վրա:
Ստեղծված իրավիճակի ուղղակի կամ անուղղակի օգտագործմամբ հանցավոր նպատակներ հետապնդող բոլոր անձանց դատախազությունը զգուշացնում է, որ գործադրվելու են քրեաիրավական անհրաժեշտ բոլոր միջոցները՝ ինչպես հանցագործությունների կանխման, այնպես էլ քրեական պատասխանատվության անխուսափելիության անշեղ ապահովման համար:
