ԵՐԵՎԱՆ, 1 մայիսի — Sputnik. Ստամբուլի ոստիկանությունը մայիսի 1-ի տոնակատարության ժամանակ ձերբակալել է Թուրքիայի տասնյակ քաղաքացիների։ Այս մասին հայտնում է AFP պարբերականը։
Թուրքիայի ոստիկանությունը շրջափակել է Ստամբուլի կենտրոնական Տաքսիմ հրապարակն ու չի թողնում մարդկանց արգելված տարածք անցնել։
Հայտնի է, որ ձերբակալվել է ավելի քան 50 մարդ, նրանք փորձում էին հրապարակ ներխուժել ու այնտեղ ակցիա անել։
Բացի այդ, քաղաքում փակել են Բեշիկթաշ շրջանի մի շարք փողոցներ։
Ոստիկանության աշխատակիցները ձերբակալել են ակցիայի մասնակիցներին քաղաքի տարբեր հատվածներում։
Մինչդեռ հազարավոր մարդիկ շարունակում են մասնակցել մայիսի 1-ին կապակցությամբ իշխանությունների կազմակերպած միջոցառումներին։ Տոնակատարությունները տեղի են ունենում ամբողջ երկրում` ներառյալ Անկարան ու Իզմիրը։
Ստամբուլում կարգը պահպանելու համար աշխատում են 26 հազար ոստիկան։ Քաղաքը վերևից երեք ուղղաթիռ է հսկում։ 25 ջրցան մեքենա ու 67 միավոր զրահատեխնիկա պատրաստ սպասում են ոստիկանության հրահանգին։
Թուրքիայում աշխատավորների օրը սովորաբար ընդդիմության ու ոստիկանության բախումների պատճառ է դառնում, սակայն վերջին տարիներին քաղաքացիներին արգելում էին հավաքվել կենտրոնական հրապարակներում ու բողոքի զանգվածային ակցիաներ անցկացնել։
Այս պահին Թուրքիայում ներքաղաքական վիճակը լարված է։ Երկիրը պատրաստվում է արտահերթ նախագահական ընտրություններին, որոնք կկայանան հունիսի 24-ին։ Նախատեսվում է, որ գործող նախագահ Ռեջեփ Թայիփ Էրդողանը երկրորդ անգամ կընտրվի երկրի նախագահ։
2017 թվականի ապրիլին երկրում տեղի ունեցավ սահմանադրական հանրաքվե, որը զգալիորեն ընդլայնեց նախագահի լիազորությունները։ Սահմանադրական փոփոխություններն ուժի մեջ կմտնեն նախագահական ընտրություններից հետո։
