ԵՐԵՎԱՆ, 7 հունիսի — Sputnik. Հայաստանը ռազմական տեխնիկայի նոր առաքումներ է սպասում Ռուսաստանից, այսօր լրագրողներին ասաց Հայաստանի պաշտպանության նախարար Դավիթ Տոնոյանը։
Պաշտպանական գերատեսչության ղեկավարը մանրամասները չբացահայտեց` միայն դրական պատասխանեց`սպասվում են արդյո՞ք ՌԴ–ից սպառազինությունների նոր առաքումներ հարցին։
Նրա խոսքով` այսօր Հայաստանի ՊՆ–ն իր առջև նպատակ է դրել լիարժեք իրագործել պաշտպանական ոլորտում ծավալված ծրագրերը` սպառազինությունների արդիականացումը, բանակի մարտունակության բարձրացումը և այլն։
«Հայաստանի զինված ուժերը պետք է ավելի մարտունակ լինեն։ Ավելի շարժունակ։ Ավելի ճկուն, որպեսզի մենք կարողանանք արձագանքել ներկա ռազմաքաղաքական սպառնալիքներին», – նշեց նա։
Նախարարը հավելեց նաև, որ Հայաստանի ԶՈւ զարգացման ծրագրում ներառված են լուրջ հակակոռուպցիոն տարրեր։
