ԵՐԵՎԱՆ, 30 հուլիսի — Sputnik. Դատարան է ուղարկվել Արմեն Ջիգարխանյանի նախկին կնոջ Վիտալինա Ցիմբալյուկ-Ռոմանովսկայայի դեմ հարուցած քրեական գործը:
Այս մասին հայտնում է Մոսկվայի դատախազության պաշտոնական ներկայացուցիչ Լյուդմիլա Նեֆեդովան։
Կինը մեղադրվում է մասնավոր կյանքի անձեռնմխելիությունը խախտելու և այդ տեղեկությունները ԶԼՄ–ներում տարածելու համար։
Քննության վարկածի համաձայն` Վիտալինան թատրոնի աշխատասենյակներից մեկում տեսախցիկ է տեղադրել, որը ամրացված է եղել առաստաղի մեջ, նպատակ ունենալով թաքնված նկարահանում իրականացնել։ Ավելի ուշ այդ կադրերը հայտնվել են հեռուստաալիքներից մեկի եթերում։
Հայցի հստակ գումարը փաստաբանը չի նշել, պատասխանելով, որ խոսքը միլիոնավոր ռուբլիների մասին է։
82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել 2017 թվականի հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։ Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։ 2017 թվականի հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։ Նրանք պաշտոնապես ամուսնալուծվեցին նոյեմբերի 27-ին։
