ԵՐԵՎԱՆ, 30 հուլիսի — Sputnik. Իտալիայի նախագահ Սերջիո Մատարելան պատրաստ է նպաստել, որ իտալական ընկերություններն իրենց նորարարությունները Հայաստան բերեն։ Այս մասին նա ասաց լրագրողներին Երևանում իր հայ գործընկեր Արմեն Սարգսյանի հետ տեղի ունեցած բանակցություններից հետո։
Ըստ Մատարելայի` նախատեսվում է աշխուժացնել համագործակցությունը տնտեսական ոլորտում։ Հայաստանում արդեն իտալական ընկերություններ կան, մյուսները մտածում են այստեղ գործունեություն ծավալելու մասին։
«Ես արդեն դա քննարկել եմ Սարգսյանի հետ, քննարկումներ կլինեն նաև այլ մակարդակներում։ Իտալիան այստեղ կբերի իր նոու–հաուները և այս տարածաշրջանի համար տնտեսական աճ կապահովի», – ասաց Իտալիայի նախագահը։
Խոսել են նաև գիտատեխնիկական համագործակցության ընդլայնման մասին։
Մատարելան նշեց, որ երկրների միջև պարտադիր պետք է համագործակցություն զարգացնել գիտության ոլորտում, մասնավորապես՝ աստղաֆիզիկայի։ Փորձի փոխանակման ծրագրեր են իրականացվելու։
Նրա խոսքով` երկկողմ հարաբերությունների մակարդակը շատ բարձր է, մասնավորապես՝ մշակույթի, հնագիտական և գիտական ոլորտներում։ Մշակութային կենտրոնի բացումը Երևանում անպայման կամրապնդի երկկողմ կապերն ու թույլ կտա Հայաստանին պահպանել իր մշակութային ժառանգությունը, կարծում է նախագահը։
Միևնույն ժամանակ Հայաստանի նախագահ Արմեն Սարգսյանը նշեց, որ մշակութային ոլորտում առկա համագործակցությունը նոր խթան կստանա մշակութային ժառանգության պահպանման հայ–իտալական կենտրոնի բացումից հետո։
Նա հույս հայտնեց, որ նախագահի այցը թույլ կտա նոր մակարդակի բարձրացնել տարբեր ոլորտներում երկու երկրների գործակցությունը։
Մատարելան Հայաստան է ժամանել երկօրյա պետական այցով և գլխավորում է իտալացի պաշտոնատար անձանց պատվիրակությունը։ Նրա հետ ժամանել է նաև դուստրը։
Իտալիայի նախագահը պետական այցի շրջանակներում կհանդիպի Հայաստանի բարձրագույն ղեկավարության և Ամենայն Հայոց Կաթողիկոս Գարեգին Բ–ի հետ։ Նրա գլխավորած պատվիրակությունը ծաղկեպսակներ կդնի «Ծիծեռնակաբերդի» հուշահամալիրում։
Սերջիո Մատարելան Հայաստան է այցելել իր գործընկեր Արմեն Սարգսյանի հրավերով։
