Դա չի կարող լինել ժողովրդական դիվանագիտության դրսևորում, որովհետև ժողովրդական դիվանագիտությունն առաջին հերթին պահանջում է, որ լինի համաձայնեցված ինչ-որ քայլ։ Sputnik Արմենիային այս մասին ասաց Դավիթ Բաբայանը։
«Եթե դա ժողովրդական դիվանագիտություն է, ապա այդպիսի պայմանավորվածություն պետք է լինի Արցախի հետ։ Իսկ մեզ հետ նման պայմանավորվածություն չի եղել»,- շեշտեց նա։
Ըստ Բաբայանի` նման հարցերում միակողմանի քայլեր չեն կարող լինել։
«Չկա արցախյան կողմի հետ պայմանավորվածություն, չկա հանդիպումների արդյունքում ձևավորված ինչ-որ քայլ, այն էլ` սահմանը անցնելու փորձերի, մարդկանց օգտագործելու, նրանց զգացմունքների վրա խաղալու, նեղ անձնական շահեր հետապնդելու հակահայկական քարոզչության համատեքստում»,- ասաց նա։
Բաբայանը նշեց նաև, որ Արցախը ժամանակին նման առաջարկներ արել է, երբ եղել են խողովակներ Ադրբեջանի հետ, բայց հիմա Ադրբեջանը փակել է ամեն ինչ։
«Մենք բազմիցս նշել ենք, որ մարդասիրական հարցերը չպետք է խառնել ու շահարկել հակամարտության կարգավորման հետ, որովհետև այդ հարցերը կարող են կարգավորվել, եթե լուծված են ռազմաքաղաքական բոլոր կարևորագույն խնդիրները։ Միայն դրանից հետո հնարավոր կլինի անդրադառնալ մարդասիրական հարցերին։ Բայց դա տեղի չի ունենում։ Նրանք պարզապես են շահարկում։ Մարդկանց բերում են առաջնագիծ։ Իսկ եթե հանկարծ ինչ-որ մեկը պայթեր ռումբի կամ ականի վրա, ո՞վ պիտի պատասխան տար»,- ասաց Արցախի Հանրապետության նախագահի մամուլի քարտուղարը։
Նրա խոսքով ` այդ պատասխանատվությունն ընկնում է միայն Ադրբեջանի իշխանության վրա, որովհետև առանց իշխանությանը տեղյակ պահելու նման բան տեղի ունենալ չէր կարող։
Բաբայանը ևս մեկ անգամ շեշտեց` ադրբեջանցիների այդ քայլը չի կարող ժողովրդական դիվանագիտության դրսևորում լինել, սա ուղղակի ադրբեջանական սադրանք է և՛ Արցախի, և սեփական ժողովրդի նկատմամբ։
