ԵՐԵՎԱՆ, 8 նոյեմբերի — Sputnik. Հայաստանին մատակարարվող գազի սակագնի նվազեցման հարցով Հայաստանը բանակցում է ՌԴ էներգետիկայի նախարարության և «Գազպրոմ» ընկերության հետ: Այս մասին այսօր կառավարության նիստից հետո լրագրողների հետ զրույցում ասաց ՀՀ էներգետիկ ենթակառուցվածքների և բնական պաշարների նախարարի պաշտոնակատար Գարեգին Բաղրամյանը:
«Այս պահին բանակցություններն ընթանում են և՛ սահմանին գազի գնի ձևավորման, և՛ ներքին կառուցվածքի հետ կապված»- ասաց նա՝ հավելելով, որ բանակցությունները չվնասելու համար չի ցանկանում այս պահին հավելյալ տեղեկություն հրապարակել:
Հարցին, թե արդյոք բանակցություններն ուղղված են սպառողի համար գազի սակագինը նվազեցնելուն, նախարարի պաշտոնակատարն այսպես պատասխանեց. «Բանակցությունները միտված են սակագնի նվազմանը: Եթե ունենանք դրական արդյունքներ, կունենանք նաև նվազում»:
Հիշեցնենք, որ «Գազպրոմի» հետ ունեցած պայմանագրի համաձայն` «Գազպրոմի» դուստր կազմակերպությունը` «Գազպրոմ Արմենիան», 1000 խմ գազի դիմաց սահմանին վճարում է 150 դոլար։
Հայաստանի շարքային սպառողին նույն ծավալով գազը վաճառվում է 290 դոլարով, ոչ ապահով խավերին` 80 դոլարով, իսկ 10 000 խմ-ից շատ սպառող խոշոր բաժանորդներին՝ 242 դոլարով, ջերմոցային ու վերամշակող ընկերություններին` 212 դոլարով։
