ԵՐԵՎԱՆ, 28 նոյեմբերի — Sputnik. «Մեզ համար կարևոր է, որ պահպանվի օրինականությունը: Այդ գումարները կվերադարձվեն այսօրվա օրենսդրության համաձայն»։ Այս մասին այսօր Իջևանում «Իմ քայլը» դաշինքի քարոզարշավի ժամանակ հայտարարեց ՀՀ վարչապետի պաշտոնակատար Նիկոլ Փաշինյանը` անդրադառնալով քրեական գործերով բացահայտված մոտ 64 միլիարդ դրամի չարաշահումներին և այն խնդրին, թե ինչու այդ գումարների վերադարձը այն արագությամբ չի լինում։
Փաշինյանը բերեց «Գոլդեն Փելըս» հյուրանոցի սեփականատեր Արմեն Ավետիսյանի օրինակը և տեղեկացրեց, որ Արմեն Ավետիսյանի ընտանիքն օրեր առաջ դիմել է պետական գույքի կառավարման վարչությանը և ասել է, որ Ծաղկաձորի «Գոլդեն Փելըս» հյուրանոցը վերադարձնում է պետությանը:
«Եթե այս պրոցեդուրան մինչև վերջ գնա, ի՞նչ պետք է անենք. պետք է հյուրանոցը հանենք հրապարակային աճուրդի, գնահատում են, որ այն նույնիսկ մինչև 20 միլիոն դոլար արժենա»,- ասաց նա:
Այս թեմայի շրջանակներում վարչապետի պաշտոնակատարը հիշատակեց Մանվել Գրիգորյանին: «Նաև գեներալ Մանվել Գրիգորյանի փաստաբաններն էին հանդես եկել հայտարարությամբ, որ նա պատրաստ է 5 միլիարդ դրամի գույք նվիրել պետությանը: Իհարկե, կառավարությանը դրան որևէ կերպ չի արձագանքել»,- ասաց նա՝ նշելով, որ դա չի արվել, քանի որ նախ որպես հանրություն՝ պետք է հասկանանք, ինչպես պետք է արձագանքենք նման դեպքերում:
Փաշինյանի խոսքով` կարևոր խնդիրներից է լինելու անցումային արդարադատության գործիքներ ստեղծելը:
