ԵՐԵՎԱՆ, 28 նոյեմբերի — Sputnik. Զուգասահքում օլիմպիական չեմպիոն Օքսանա Կազակովան պաշտպանել է Եվգենյա Մեդվեդևային, ում կանադացի մարզչի մոտ տեղափոխվելուց և ոչ այդքան հաջող ելույթների շարքից հետո սուր քննադատության են ենթարկել հայրենիքում։
Նշենք, որ Ֆրանսիայում Գրան պրիի փուլում ձախողումից հետո 19–ամյա գեղասահորդուհին հայտարարել է, որ այլևս չի օգտվում սոցիալական ցանցերից մի շարք երկրպագուների կողմից բացասական արտահայտությունների պատճառով։ Մեդվեդևան շատ է վիրավորվել դավաճանության մեջ մեղադրանքներից։
Sportdaily.ru պարբերականին տված հարցազրույցում Կազակովան հայտարարել է, որ երկրպագուները կանխակալ վերաբերմունք ունեն Ժենյայի նկատմամբ և նրա հասցեին շատ չհիմնավորված բացասական արտահայտություններ են անում։
«Օրինակ` Մարիա Շարապովան։ Նա պարտվել է խոշոր մրցաշարերում, բռնվել դոպինգի վրա, բայց նրա վրա, չգիտես ինչու, չեն հարձակվում»,– ասել է նա։
Մեկնաբանելով Ռուսաստանի հավաքականի թիվ մեկ գեղասահորդ Ալինա Զագիտովայի և Մեդվեդևայի հարաբերությունները` Կազակովան ասել է, որ նրանց միջև ատելություն չկա։ Կազակովայի խոսքով` ուղղակի առողջ մրցակցություն է, որի արդյունքում նրանցից յուրաքանչյուրը ցանկանում է աճել և ինչ-որ նոր բան սովորել։
«Պետք է չմուշկներ հագնել և անցնել նրա ուղին, իսկ հետո նոր դատել Ժենյային։ Լավ է, որ մեզ մոտ կանանց գեղասահքում նման մրցակցություն կա։ Նախկինում այդպիսի պատմություն է եղել` կապված Եվգենի Պլյուշչենկոյի և Ալեքսեյ Յագուդինի հետ», – ասել է նա։
Նոյեմբերի 24–ին Մեդվեդևան իր կարիերայի ընթացքում առաջին անգամ չի կարողացել անցնել Գրան պրիի եզրափակիչ` զբաղեցնելով չորրորդ տեղը։
