ԵՐԵՎԱՆ, 11 դեկտեմբերի - Sputnik. Buta Palace ռեստորանի արտ–տնօրեն Տախվելի Ռամիզ Պարվիզօղլուն կնոջ հետ վիճաբանության ժամանակ նրան նետել է 5–րդ հարկից։ Այս մասին հայտնում է Sputnik Ադրբեջանը` հղում անելով ոստիկանության մամուլի ծառայությանը։
Հանցագործությունը տեղի է ունեցել դեկտեմբերի 9-ի, լույս 10–ի գիշերը։ Մահացածը 1988 թվականին ծնված Տախվելի Ադելյա Ազեր գիզին է։
Հայտնում են, որ Պարվիզօղլուն Բաքվում հայտնի Buta Palace ռեստորանի արտ–տնօրենն է։
Իրավապահ մարմինները նշել են, որ տղամարդը չի փորձել թաքնել հանցագործության վայրից ու սպասել է ոստիկաններին։
Նախնական հարցաքննության ժամանակ նա խոստովանել է, որ սպանությունը կատարել է թմրանյութի ազդեցության տակ։ Ասել է, որ մարիխուանա է ծխել, փորձաքննությունը հաստատել է նրա ասածը։
Նախաքննության արդյունքում պարզվել է, որ դեկտեմբերի 10–ին, մոտավորապես գիշերվա ժամը երեքին ամուսինները պատշգամբ են դուրս եկել, որպեսզի երեխաները չլսեն ու չտեսնեն` ինչպես են վիճում։ Sputnik Ադրբեջանի տվյալներով` ամուսինները երկու երեխա ունեն, ավագը` 10 տարեկան աղջիկը, հոգեկան շեղումներ ունի։
Վիճաբանության ընթացքում ամուսինն իբր մեղադրել է կնոջը, որ իրեն չի հասկանում։ Կինը փորձել է հակաճառել, և այդ պահին ամուսինը կորցրել է ինքնատիրապետումն ու նրան նետել է պատշգամբից։
Տղամարդու մեքենայի խուզարկության ժամանակ ոստիկանները 5,647 գրամ մարիխուանա են հայտնաբերել։
