ԵՐԵՎԱՆ, 21 դեկտեմբերի — Sputnik. «Փյունիկ» ֆուտբոլային ակումբը ծրագրում է 4-5 հազար մարդու համար նախատեսված մարզադաշտ կառուցել։ Այսօր Երևանում հրավիրված ասուլիսի ժամանակ ասաց ակումբի ղեկավար Արթուր Սողոմոնյանը։
«Մենք պատրաստ ենք ներդրումներ անել, զարգացնել նաև մեր բազան։ Հիմա լրջորեն մտածում ենք, մենք երազում ենք մեր փոքր մարզադաշտը կառուցել «Փյունիկի» համար։ Մենք շատ ենք ճանապարհորդել, տեսել ենք, որ ակումբը ակումբ է դառնում միայն այն ժամանակ, երբ տնային մարզադաշտ է ունենում», - ասաց Սողոմոնյանը։
Նրա խոսքով՝ ժամանակակից մարզադաշտերը, նույնիսկ ոչ մեծ, խիստ տարբերվում են նախկիններից։ Եթե նախկինում մարզադաշտերն ավելի շատ ունիվերսալ հարթակ էին, որից օգտվում էին ոչ միայն մարզական նպատակներով, ապա ժամանակակից մարզադաշտերը կառուցվում են միայն ֆուտբոլի համար։
Ծրագրվում է նաև սեփական բազա կառուցել։
«Փյունիկի» մարզաբազայի հարևանությամբ կա տարածք, որը պատկանում է պետությանը, և մենք աշխատում ենք այդ տարածքը գնելու ուղղությամբ», - ասաց Սողոմոնյանը։
Նա նշեց, որ գործող բազան դժվարությամբ կարելի է մարզական անվանել, և այն նախատեսված չէ ֆուտբոլիստների նախապատրաստության լուրջ փուլեր անցկացնելու համար։
Սողոմոնյանը պատրաստ է 3 տարվա ընթացքում 10-15 միլիոն դոլար ներդրում անել բազայի և մարզադաշտի շինարարության համար։
Sputnik Արմենիան հետաքրքրվեց` քանի՞ մարդու համար նախատեսված մարզադաշտ կլինի, Սողոմոնյանը պատասխանեց` 4-5 հազար։
«Ուզում ենք հարմարավետ տնային ստադիոն կառուցել, որտեղ գալը հաճելի կլինի: Շատ ենք ուրախանում, որ մեր խաղերին գալիս են ընտանիքներով, երեխաների հետ», - ասաց Սողոմոնյանը։
Նրա խոսքով՝ մարզադաշտը նախատեսված կլինի հենց ներքին առաջնություն անցկացնելու համար։
