ԵՐԵՎԱՆ, 10 ապրիլի - Sputnik. Անօդաչուներ արտադրող ADA Aerospace ռուսական ընկերությունը Հայաստանում արտադրություն կհիմնի։ Այս մասին ՌԻԱ Նովոստիին հայտնել են ընկերությունում։
«ADA Aerospace–ն ու Pro MAQ ընկերությունը համատեղ ձեռնարկություն են ստեղծում Հայաստանի տարածքում TRIADA նախագծի անօդաչու թռչող սարքերի սերիական արտադրության համար։ Գործընկերները նախատեսում են ոչ միայն անօդաչու թռչող սարքերի համատեղ արտադրություն զարգացնել, այլև արտադրանքը հեռանկարային միջազգային շուկաներ հանել», – հայտնել է գործակալության զրուցակիցը։
Բացի այդ, ընկերությունը 4,5 միլիոն դոլարի TRIADA նախագծի անօդաչուներ կմատակարարի Հայաստան։
Մատակարարումը երկու փուլով կիրականացվի ու կավարտվի մինչ 2020 թվականը։ TRIADA MK II սարքերի առաջին խմբաքանակը ՀՀ ԱԻՆ–ին կմատակարարվի 2019 թվականին, TRIADA MK III օդաչուների երկրորդ խմբաքանակը` մինչ 2020 թվականը։
ADA Aerospace ընկերությունն, ընդհանուր առմամբ մի քանի տասնյակ սարք կտրամադրի հայ գործընկերներին։ Ընկերությունում նշել են, որ դրանք օգտագործվելու են այնպիսի առանցքային ոլորտներում, ինչպիսին են գյուղատնտեսությունը, անտառների ու ջրային ավազանների հսկողությունը, անտառային հրդեհների մասին ծանուցումը, բույսերի պաշտպանության միջոցներով դաշտերի մշակումը, առաջին օգնության ցուցաբերում, բեռների առաքում ու մոնիթորինգ։
ADA Aerospace ընկերությունը, որը հիմնվել է 2015 թվականին, զբաղվում է նոր սերնդի անօդաչու թռչող սարքերի նախագծմամբ ու արտադրությամբ։ Այն ներկայացուցչություններ ունի Թուրքիայում, Իսրայելում, Բուլղարիայում ու Գերմանիայում։
