ԵՐԵՎԱՆ, 18 օգոստոսի — Sputnik. Վրաստանում ՀՀ դեսպան Ռուբեն Սադոյանն այցելել է Վրաստան–Հայաստան սահմանային անցակետ` ծանոթանալու Սադախլոյի անցակետում տիրող իրավիճակին։
Այս մասին հայտնում է Վրաստանում ՀՀ դեսպանատան Facebook-ի էջը։
«Այս պահին սահմանին հերթեր չկան»,– ասված է հաղորդագրության մեջ։
Դեսպան Սադոյանը հանդիպել է անցակետի ղեկավարի հետ, քննարկվել են նախօրեին տրանսպորտային միջոցների երկար հերթին առնչվող հարցեր։ Անցակետի ղեկավարը հայտնել է, որ դրա հիմնական պատճառը վերաարտահանվող տրանսպորտային միջոցների մեծ քանակությունն է, որը կազմել է օգոստոսի 17-ին գոյացած մեքենաների հերթի 70-80%-ը։
Դեսպանը նշել է, որ անցակետը պարտավոր է աշխատել ողջ ծավալով և բարձր մակարդակով սպասարկել ՀՀ քաղաքացիներին։
Վարորդների համար. ի՞նչ է փոխվել Վրաստան մուտք գործելու կանոններում
Երեկ` օգոստոսի 17-ին համացանցում տեղեկություններ էին տարածվել Սադախլոյի անցակետում աննախադեպ հերթերի մասին։ Օգտատերերից ոմանք հայտնում էին, որ հերթը գոյացել է այն պատճառով, որ անցակետի վրացական հատվածում միայն մեկ անցուղի է աշխատում։
Ավելի ուշ Վրաստանում ՀՀ դեսպանությունը հանդես եկավ հայտարարությամբ, որ այդ տեղեկությունն իրականությանը չի համապատասխանում, և հերթի պատճառը միայն տրանսպորտային միջոցների մեծ քանակությունն է։
Հայը որոշել է գումար վաստակել IQOS-ի միջոցով, բայց բռնվել է Վրաստանի «Սադախլո» անցակետում
ՀՀ դեսպանությունը հայտնել էր նաև, որ մշտական կապի մեջ է Բագրատաշեն-Սադախլո անցակետի հայկական և վրացական հատվածների ղեկավարների հետ, և որ անցակետի երկու հատվածներն էլ աշխատում են ամբողջ ծանրաբեռնվածությամբ ու ծավալով, գործում են բոլոր անցուղիները։
