ԵՐԵՎԱՆ, 19 Սեպտեմբեր — Sputnik. ՀՀ նախկին ոստիկանապետ Վլադիմիր Գասպարյանի պաշտպանները ՀՀ գլխավոր դատախազին ներկայացրել են գրավոր բողոք` Գասպարյանի նկատմամբ քրեական հետապնդումը անհապաղ դադարեցնելու մասին։ Այս մասին Facebook սոցիալական ցանցի իր էջում գրել է Գասպարյանի փաստաբան Տիգրան Աթանեսյանը:
«Դատախազին ներկայացրել ենք գրավոր բողոք Գասպարյանի նկատմամբ քրեական հետապնդումը անհապաղ դադարեցնելու մասին՝ հանցակազմի բացակայության պատճառաբանությամբ: Քննիչի կողմից, մեր կարծիքով, թույլ է տրվել կոպիտ իրավաբանական սխալ՝ կապված օրենքի 2011–ին գործող խմբագրության և ներկայիս խմբագրության հետ»,–գրել է նա։
ՀՀ նախկին ոստիկանապետ Վլադիմիր Գասպարյանին մեղադրանք է առաջադրվել
Փաստաբանի խոսքով` արդյունքում ակնհայտ է, որ բացակայում է հանցակազմի սուբյեկտիվ կողմը, այսինքն՝ հանցակազմը:
Գասպարյանի պաշտպանը գրել է նաև, որ ակնկալում է դատախազության «մեկ էջանոց «մոնումենտալ» իրավական մտքի հուշարձան-պատասխանը»` իրենց բողոքը մերժելու մասին:
Հիշեցնենք, որ ավելի վաղ Աթանեսյանը հայտնել էր, որ Գասպարյանը լուրջ չի վերաբերվում իրեն առաջադրված մեղադրանքին և հրաժարվել է քննության այս փուլում ցուցմունքներ տալ։
«Մուլտի Գրուպի» տնօրեն Սեդրակ Առուստամյանին մեղադրանք է առաջադրվել. նրան կկալանավորե՞ն
Գասպարյանին մեղադրանք էր առաջադրվել իշխանությունը չարաշահելու համար` ՀՀ քրեական օրենսգրքի 375-րդ հոդվածի 2-րդ մասով։
Նշենք, որ Գասպարյանի նկատմամբ խափանման միջոց է ընտրվել ստորագրություն չհեռանալու մասին:
