ԵՐԵՎԱՆ, 7 դեկտեմբերի — Sputnik. 2019-ի տարեվերջի համար 2019թ-ի բյուջեի օրենքի քննարկումների ընթացքում կանխատեսված մեծությունից ավելի ցածր արտաքին պետական պարտք կունենանք արձանագրված։ Այս մասին այսօր լրագրողների հետ հանդիպման ժամանակ ասաց ՀՀ ֆինանսների նախարար Ատոմ Ջանջուղազյանը:
«Տարեվերջին Հայաստանի արտաքին պարտքի ավելի նվազ ցուցանիշ կունենանք, քանի որ համեմատաբար ավելի ցածր կատարման ցուցանիշներ ունենք վարկային միջոցների հաշվին իրականացվող նպատակային ծրագրերի մասով։ Կարծում ենք, որ 2019–ին կառավարության պարտք-ՀՆԱ հարաբերակցությունը կլինի 49 տոկոսից ավելի և 50 տոկոսից ցածր»,–ասաց նա։
Նա նշեց նաև, որ նախկինում, երբ շրջանառվում էր պետական պարտքի թեման, նշվում էր, որ 2020–ին պիկ է լինելու պարտքի սպասարկման առումով, սակայն հիմա կարելի է ուրախությամբ արձանագրել, որ այդ հարցն այլևս ակտուալ չէ։ Ջանջուղազյանի խոսքով` 2020 թվականի բյուջեով ակնկալում են, որ պետական պարտք-ՀՆԱ հարաբերակցությունը կկազմի մոտ 48,2 տոկոս:
Մենաշնորհների հաղթահարման շնորհիվ գները նույնիսկ նվազել են. Փաշինյանը թվեր ներկայացրեց
ՀՀ ֆինանսների նախարարը նշեց նաև, որ տարբեր երկրների դասակարգման համար օգտագործվող ցուցանիշների տեսակետից ՀՀ-ն ունի նվազ պարտքի բեռ ունեցող երկրի գնահատական:
Հիշեցնենք, որ վերջին տասը տարում Հայաստանի պետական պարտքը մոտ 4 անգամ ավելացել է։ Այս տարվա հոկտեմբերի վերջին արտաքին պետական պարտքը կազմել է 5 մլրդ 573 մլն դոլար, որն ավելի քիչ է, քան 2018թ մարտի վերջին էր՝ 5 մլրդ 574 մլն դոլար:
Ազգային ժողովն ընդունեց հաջորդ տարվա բյուջեն. 37 պատգամավոր դեմ քվեարկեցին
