ԵՐԵՎԱՆ, 31 հունվարի — Sputnik. Sputnik Ղազախստանը գրում է, որ Եվրասիական տնտեսական հանձնաժողովի նախագահ Տիգրան Սարգսյանը, որի վերջին աշխատանքային օրն է այս պաշտոնում, արժանացել է Ստոլիպինի առաջին աստիճանի շքանշանի։
ՌԴ կառավարության ղեկավար Միխայիլ Միշուստինն անձամբ է շքանշանը հանձնել Սարգսյանին։
«Վստահ եմ, որ Ձեզ այս դահլիճում մանրամասն ներկայացնելու կարիք չկա, Դուք գլխավորել եք Հայաստանի կառավարությունը նրա պատմության բարդ շրջանում` 2008-2009թթ–ի համաշխարհային տնտեսական ճգնաժամի ժամանակ, և կարողացել եք իրականացնել մի շարք կարևոր տնտեսական բարեփոխումներ, իրագործել արդյունավետ հակաճգնաժամային միջոցներ», – ասել է Միշուստինը։
Նա նշել է, որ Սարգսյանի նախագահության օրոք հաջողվել է անցնել ԵԱՏՄ կայացման ամենաբարդ փուլը։
Պետք է ակտիվացնել ԵԱՏՄ ընդհանուր էներգաշուկա ստեղծելուն ուղղված ջանքերը․ Փաշինյան
«Ուզում եմ շնորհակալություն հայտնել այդ մեծ աշխատանքի համար, և, օգտվելով առիթից, շնորհավորել Ձեզ հոբելյանի կապակցությամբ», – նշել է Միշուստինը։
Տիգրան Սարգսյանը, որը հունվարի 29-ին դարձավ 60 տարեկան, շնորհակալություն է հայտնել ՌԴ վարչապետին բարձր պարգևի համար։
Հայաստանը պատասխանատու մոտեցում է դրսևորում ԵԱՏՄ–ի նկատմամբ. դեսպան Կոպիրկին
Հունվարի 31–ին Ալմաթին գտնվում է աշխարհի քաղաքական գործիչների և տնտեսագետների ուշադրության կենտրոնում։ Ղազախստանի հարավային մեգապոլիսում հավաքվել են ԵԱՏՄ երկրների վարչապետները` քննարկելու միության հետագա զարգացումը։
