ԵՐԵՎԱՆ, 23 մարտի – Sputnik․ «Արմենիա» ավիաընկերությունը ստեղծված իրավիճակում չեղարկված չվերթների ուղևորներին առաջարկում է տոմսերի գնին համարժեք վաուչերներ ստանալ։ Տեղեկությունը հայտնում է ընկերության մամուլի ծառայությունը։
«Հաշվի առնելով ստեղծված իրավիճակը, չվերթների զանգվածային կասեցումը և տոմսերի վերադարձները, «Արմենիա» ավիաընկերությունը չեղարկված չվերթների ուղևորներին առաջարկելու է իրենց տոմսերի արժեքներին համարժեք վաուչերներ մեկ տարի ժամկետով օգտագործման պայմանով»,- նշված է ընկերության տարածած հաղորդագրության մեջ։
Միաժամանակ նշվում է, որ ավիաընկերության աշխատակազմի 95 տոկոսը գտնվում է իրենց հասանելիք և ավիաընկերության կողմից վճարվող արձակուրդում, իսկ ընկերությունը չի հրաժարվում իր պարտավորություններից և ակնկալում է ուղևորների փոխըմբռնումը ստեղծված իրավիճակում։
«Աերոֆլոտը» չեղարկել է Երևանի ուղղությամբ որոշ չվերթերը
Հիշեցնենք, որ աշխարհի մի շարք երկրներում, այդ թվում՝ Հայաստանում, կորոնավիրուսի բռնկումը կանխելու նպատակով հաստատված արտակարգ դրության պայմաններում բազմաթիվ ավիաընկերություններ անորոշ ժամանակով դադարեցրել են դեպի Հայաստան և հակառակ ուղղություններով չվերթերը։
ՀՀ քաղավիացիայի կոմիտեի՝ մարտի 17-ի տվյալններով՝ դեպի Հայաստան թռիչքներ իրականացնող 15 ավիաընկերություն հայտարարել են գրեթե 20 ուղղություններով չվերթերը ժամանակավորապես դադարեցնելու մասին։
Նշենք, որ կորոնավիրուսի բռնկման պատճառով այս օրերին վնասները զգալի են համաշխարհային տուրիզմի և ավիափոխադրումների ոլորտներում։ Գործնական ճանապարհորդությունների համաշխարհային ասոցիացիայի (GBTA) հաշվարկներով՝ ամբողջ աշխարհում չեղարկված գործնական ճամփորդությունների հետևանքով գործարարների կորուստները կարող են հասնել մինչև 820 միլիարդի։ Ուղևորությունների և տուրիզմի համաշխարհային կազմակերպության ղեկավար Գլորիա Գևարայի խոսքով՝ 2020 թվականին կորոնավիրուսի հետևանքով տուրիզմի մասնաբաժինը կարող է կրճարտվել ¼-ով, ինչի հետևանքով մոտ 50 միլիոն մարդ կարող է գործազուրկ դառնալ։
Ամբողջ աշխարհում տարբեր ուղղություններով չեղարկված հարյուրավոր չվերթերի պատճառով ահռելի կորուստներ են կրում ավիաընկերությունները։ Օդային տրանսպորտի միջազգային ասոցիացիայի (IATA)-ի լավատեսական հաշվարկներով՝ ուղևորափոխադրումների ոլորտում ավիաընկերությունների կորուստները կհասնեն մոտ 63 միլիարդ դոլարի․սա այն դեպքում, եթե աշխարհը կարողանա մոտալուտ ժամանակներում հաղթահարել կորոնավիրուսը, իսկ եթե Covid 19-ի տարածումը շարունակվի, ապա վնասները կհասնեն մոտ 119 միլիարդի։
