Կանադան միշտ կլինի Հայաստանի մեծ բարեկամը․ նորանշանակ դեսպանը՝ ՀՀ նախագահին
15:30 20.10.2023 (Թարմացված է: 16:18 20.10.2023)
Կանադայի դեսպանն իր հավատարմագրերն է հանձնել ՀՀ նախագահ Վահագն Խաչատուրյանին
© Photo : official site of the President of RA
Բաժանորդագրվել
Վահագն Խաչատուրյանը նշել է, որ ՀՀ-ում Կանադայի դեսպանատան բացումը նոր խթան կլինի երկրների հարաբերությունների զարգացման գործում։
ԵՐԵՎԱՆ, 20 հոկտեմբերի – Sputnik. Հայաստանի Հանրապետությունում Կանադայի արտակարգ և լիազոր դեսպան Էնդրյու Թըրներն իր հավատարմագրերն է հանձնել ՀՀ նախագահ Վահագն Խաչատուրյանին։ Տեղեկությունը հայտնում է ՀՀ նախագահի աշխատակազմի մամուլի ծառայությունը։
Նախագահը շնորհավորել է նորանշանակ դեսպանին պաշտոնը ստանձնելու կապակցությամբ և հաջողություններ մաղթել։
«Վստահ եմ, որ Ձեր նշանակումը որպես առաջին ռեզիդենտ դեսպան և Հայաստանում Կանադայի դեսպանատան բացումը նոր խթան են լինելու մեր երկրների հարաբերությունների զարգացման գործում: Երկու երկրի միջև հարաբերություններն այլ արժեք ունեն։ Շնորհակալություն այն աջակցության համար, որ Կանադայի կառավարությունը ցուցաբերում է Հայաստանին: Այդ աջակցությունը մենք զգում ենք ոչ միայն Հայաստանում, այլ նաև միջազգային հարթակներում»,- ասել է Խաչատուրյանը։
Դեսպան Թըրներն էլ նշել է, որ Կանադան եղել է և միշտ կլինի Հայաստանի մեծ բարեկամն ու աջակիցը: Նա ընդգծել է, որ Հայաստանն արդեն իսկ ականատես է եղել Կանադայի արձագանքին վերջին ճգնաժամին՝ ինչպես մարդասիրական աջակցության, այնպես էլ ՄԱԿ-ի և տարբեր հարթակներում հայտարարությունների տեսքով:
«Դեսպանատան բացումը ևս մեկ հանգամանք է մեր հարաբերությունների ամրապնդման գործում»,- ասել է Թըրները։
Զրույցի ընթացքում անդրադարձ է կատարվել նաև Լեռնային Ղարաբաղից բռնի տեղահանվածների իրավունքների պաշտպանության և հումանիտար խնդիրներին առնչվող հարցերին և տարածաշրջանային զարգացումներին: Հանրապետության նախագահն ընդգծել է, որ Հայաստանը հավատարիմ է հարևանների հետ հարաբերությունների կարգավորման և վերջնական ու կայուն խաղաղության հասնելու իր դիրքորոշմանը:
Էնդրյու Թըրներն իր հավատարմագրերն է հանձնել ՀՀ նախագահ Վահագն Խաչատուրյանին
© Photo : official site of the President of RA
