ԵՐԵՎԱՆ, 8 փետրվարի — Sputnik. Մարտի 1-ից հնարավոր կլինի հայտ ներկայացնել «.հայ» դոմեն ստանալու համար, պաշտոնական հայտերն ուսումնասիրվում են դեռևս անցյալ տարվանից։
«Հայտերի ընդունման գործընթացը սկսվել է սեպտեմբերին, սակայն այն ստանալու հնարավորությունը հասանելի է եղել միայն կազմակերպությունների ու ապրանքանիշերի սեփականատերերի համար։ Մարտի 1-ից բոլոր ցանկացողները կարող են դոմեն ստանալու հայտ ներկայացնել», — ասաց «Ինտերնետ հանրություն» ՀԿ նախագահի տեղակալ Գրիգոր Սաղյանը։
Նրա խոսքով` դոմենի գրանցման հայտ ներկայացնելու համար անհրաժեշտ է գրանցվել sunrise.itc կայքում։
«Արդեն հայտ են ներկայացրել բոլոր պետական կառույցներն ու շուրջ 100 կազմակերպություն», — նշել է Սաղյանը։
Բացի այդ, Համացանցի անվտանգության միջազգային օրվա (փետրվարի 8) համատեքստում Սաղյանն անդրադարձավ երեխաների հասանելիությունը համացանցին սահմանափակելու անհրաժեշտությանը։
Նրա խոսքով` Հայաստանում արդեն մի քանի տարի գործող "save am" նախագծի շրջանակում դպրոցների ուսուցիչները ծանոթանում են համացանցից անվտանգ օգտվելու հիմունքներին։
«Այլ հարց է, թե մինչև որ տարիքն է անհրաժեշտ սահմանափակել երեխաների հասանելիությունը», — ասում է Սաղյանը։
Նրա կարծիքով` եթե մարդուն 16 տարեկանում թույլատրված է ամուսնանալ, ապա այդ տարիքից պետք է հանվեն համացանցից օգտվելու բոլոր արգելքները։
Սաղյանը նշեց, որ մոտ ապագայում Համացանցի կառավարման խորհուրդ կներկայացվի անվտանգ համացանցի հայեցակարգի նախագիծը, որը համալիր մոտեցում է նախատեսում խնդրի լուծմանը։
Հայաստանի պետական ճարտարագիտական համալսարանի պրոֆեսոր Էդուարդ Մանուկյանն իր հերթին անդրադարձավ փետրվարի 7-ին նշված Համացանցում հայատառ գրելու ոչ պաշտոնական օրվան։
«Ժամանակն է, որ մենք ոչ միայն հայատառ գրենք, այլև ուշադրություն դարձնենք հայերենի հնչյուններին։ Անհրաժեշտ է, որպեսզի հայկական բառերը ճիշտ հնչեն», — ասաց Մանուկյանը։
Պրոֆեսորը պատմեց, որ իրենք զբաղվում են տարբեր բառարանների մշակմամբ, հայկական այն բառերի տարածմամբ, որոնք առօրյա կյանքում դուրս են մղվել, և դրանց փոխարեն օգտագործվում են օտար բառեր։ Նրա խոսքով` հատկապես կարևոր է ստեղծել հայկական էլեկտրոնային գրադարաններ։
Մանուկյանը ցավով նշեց, որ այս ոլորտում հիմնականում աշխատում են առանձին անհատներ, իսկ պետությունը քիչ ուշադրություն է դարձնում այս բնագավառին։ Նա հույս հայտնեց, որ իշխանությունն ամեն դեպքում կհետաքրքրվի նման նախագծերով ու կսկսի ֆինանսական աջակցություն և օգնություն ցուցաբերել։
