ԵՐԵՎԱՆ, 9 փետրվարի — Sputnik. Ամերիկյան Ֆլորիդա նահանգի 33-ամյա բնակիչ Դերեկ Մեդինան ցմահ բանտարկության է դատապարտվել կնոջը` Ջենիֆերին սպանելու համար։ Ողբերգությունը տեղի է ունեցել 2013 թվականին, սակայն գործի հետաքննությունը նոր է ավարտվել։ Հետաքրքիրն այն է, որ տղամարդը ժամանակին գիրք էր գրել այն մասին, թե ինչ է պետք անել ամուսնությունը չկորցնելու համար, հայտնում է Inquisitr-ը։
Ընտանեկան հարաբերությունների «փորձագետը» 3 տարի առաջ Ֆեյսբուքի իր էջում տեղադրել էր սեփական ձեռքերով սպանված կնոջ լուսանկարը և գրել. «Ինձ կբանտարկեն կամ կգլխատեն կնոջս սպանելու համար։ Ես ձեզ սիրում եմ։ Ինձ կտեսնեք նորություններով»։
Սպանված կնոջ` Ջենիֆերի լուսանկարը հրապարակելուց հետո նրան կալանավորել էին։ Լուսանկարում կինը պատկերված էր ծնկաչոք, ճակատը պատին հենած։ Ամերիկուհու մարմինն արյունով էր պատված։ Մեդինան կրակել էր կնոջ վրա սեփական ատրճանակից։
Գրողն իր մեղքը մասամբ է խոստովանել։ Նա ասել է, թե կնոջը սպանել է ինքնապաշտպանական նկատառումներից ելնելով։ Կինը խնդրել է ամուսնուն արթնացնել իրեն հեռուստաֆիլմից առաջ, իսկ Մեդինան մոռացել է ու չի արթնացրել։ Ջենիֆերն առավոտյան սկսել է վիճել ամուսնու հետ, ու վեճն ավարտվել է մարդասպանությամբ։
Դատարանը որոշել է, որ սպանությունն ինքնապաշտպանական բնույթ չէր կարող կրել։ Բացի սպանությունից, Մեդինային մեղադրել են նաև ծնողական պարտականությունները ոտնահարելու մեջ, քանի որ սպանության պահին տանն է եղել նաև Ջենիֆերի նախորդ ամուսնությունից ծնված դուստրը։
